میناکشی نٹراجن کی نامزدگی مسترد کیے جانے کے خلاف حیدر آباد میں ’جمہوریت بچاؤ ستیاگرہ‘ کا انعقاد

راجیہ سبھا انتخاب کے لیے کانگریس کی سینئر لیڈر میناکشی نٹراجن کا پرچۂ نامزدگی مسترد کیے جانے کا معاملہ سرخیوں میں ہے۔ عدالت نے بھی اس معاملہ میں ایسا فیصلہ سنایا، جس سے میناکشی نٹراجن اور کانگریس کے سرکردہ لیڈران انتہائی مایوس ہیں۔ اس معاملہ پر آج حیدر آباد میں ’جمہوریت بچاؤ ستیاگرہ‘ کا انعقاد کیا گیا، جس میں بی جے پی کے ساتھ ساتھ الیکشن کمیشن کو بھی ہدف تنقید بنایا گیا۔

کانگریس نے اپنے آفیشیل ’ایکس‘ ہینڈل سے ’جمہوریت بچاؤ ستیاگرہ‘ کی کچھ تصویریں جاری کی ہیں اور ساتھ ہی مطلع کیا ہے کہ ’’میناکشی نٹراجن کی راجیہ سبھا انتخاب کے لیے نامزدگی مسترد کیا جانا جمہوری اقدار، آئین اور انتخابی عمل کی غیر جانبداری پر سنگین سوال کھڑے کرتا ہے۔‘‘ ساتھ ہی لکھا ہے کہ ’’میناکشی نٹراجن کا پرچۂ نامزدگی مسترد کیے جانے کے خلاف راجیو گاندھی پنچایت راج سنگٹھن کے قومی صدر سنیل پنوار کی قیادت میں ایک ستیاگرہ منعقد کیا گیا۔ اس دوران تلنگانہ پردیش کانگریس کمیٹی کے صدر مہیش گوڑ سمیت کانگریس کے کئی سینئر لیڈران و کارکنان موجود رہے۔‘‘