بغیر کوئی جنگ جوانوں کے شہید ہونے پر بھاگوت نے مودی حکومت کو بنایا تنقید کا نشانہ

گزشتہ کچھ دنوں سے مودی حکومت کو تنقید کا نشانہ بنانے والی آر ایس ایس نے مودی حکومت کے خلاف ایک بار پھر آواز بلند کی ہے۔ آر ایس ایس کے دو بڑے لیڈروں نے مودی حکومت کو سرحد پر لگاتار شہید ہو رہے جوانوں اور رام مندر ایشو پر تنقید کا نشانہ بنایا ہے۔ آر ایس ایس سربراہ موہن بھاگوت نے مودی حکومت کی پالیسیوں پر انگلی اٹھاتے ہوئے ناگپور کی ایک تقریب میں کہا کہ ’’کوئی جنگ نہیں ہو رہی ہے پھر بھی ملک کی سرحدوں پر جوان شہید ہو رہے ہیں۔ ایسا اس لیے ہو رہا ہے کیونکہ ہم اپنا کام ٹھیک سے نہیں کر رہے۔‘‘ ساتھ ہی انھوں نے مودی حکومت کو کٹہرے میں کھڑا کرتے ہوئے یہ بھی کہا کہ ’’اگر کوئی جنگ نہیں ہو رہا تو ایسی کوئی وجہ نہیں ہونی چاہیے کہ سرحد پر تعینات فوجی اپنی جان گنوائے، لیکن ایسا ہو رہا ہے جو افسوسناک ہے۔‘‘

موہن بھاگوت کے علاوہ آر ایس ایس کے جس بڑے لیڈر نے مرکزی حکومت پر انگلی اٹھائی ان کا نام بھیا جی جوشی ہے۔ انھوں نے پریاگ راج میں منعقد کمبھ میلہ کے دوران اپنی ناراضگی ظاہر کی۔ یہاں ایک پرہجوم تقریب سے خطاب کرتے ہوئے انھوں نے رام مندر کا ایشو اٹھایا۔ بھیا جی جوشی نے کہا کہ ’’رام مندر صرف ایک مندر کی تعمیر نہیں ہے بلکہ کروڑوں ہندوؤں کی عقیدت اور عزت سے بھی جڑا ہوا ہے۔‘‘ رام مندر معاملہ پر آر ایس ایس نے مودی حکومت کے ذریعہ کوئی ٹھوس قدم نہ اٹھائے جانے پر یہ طنز بھی کیا کہ اس کی تعمیر 2019 یا 2024 سے پہلے نہیں ہوگی بلکہ 2025 میں تعمیراتی کام شروع ہوگا۔