’نوجوانوں کے مستقبل سے کھلواڑ‘، نیٹ بحران اور گرفتاریوں کے درمیان راہل گاندھی کا مودی حکومت پر سخت حملہ

نئی دہلی: نیٹ یو جی 2026 کا پیپر لیک ہونے کے بعد امتحان منسوخ کیے جانے اور بہار میں مسلسل ہو رہی گرفتاریوں کے درمیان لوک سبھا میں قائد حزب اختلاف کے قائد اور کانگریس رکن پارلیمنٹ راہل گاندھی نے مودی حکومت پر سخت حملہ کیا ہے۔ انہوں نے کہا کہ بی جے پی حکومت نوجوانوں کے مستقبل سے کھلواڑ کر رہی ہے اور امتحانی نظام میں بدعنوانی کو روکنے میں ناکام ثابت ہوئی ہے۔

راہل گاندھی نے سوشل میڈیا پلیٹ فارم ’ایکس‘ پر جاری اپنی تازہ پوسٹ میں نوجوانوں سے کہا کہ وہ خود تلاش کریں کہ ’’نیٹ 2024 کی سنگین چوری کے دوران این ٹی اے کا ڈائریکٹر جنرل کون تھا اور مودی حکومت نے آج اسے کہاں بٹھایا ہے؟‘‘ انہوں نے کہا کہ بی جے پی محنتی طلبہ کے مستقبل سے کھیلنے والوں کو تحفظ فراہم کرتی ہے اور انہیں ترقی دیتی ہے۔ انہوں نے کہا کہ وزیر اعظم نریندر مودی اور بی جے پی نوجوانوں کے مستقبل کی ’چوری‘ میں شریک ہیں۔

راہل گاندھی نے اپنی پوسٹ میں مزید لکھا کہ جس بازار میں نوجوانوں کی محنت اور خواب نیلام ہو رہے ہوں، وہاں ’جتنی بڑی چوری، اتنا بڑا انعام‘ کا اصول چل رہا ہے۔ اس سے قبل بھی وہ بعض سرکاری تقرریوں کو لے کر بی جے پی اور الیکشن کمیشن پر سوال اٹھا چکے ہیں، لیکن اس بار ان کا حملہ براہ راست نیٹ تنازعہ اور این ٹی اے کے کردار پر مرکوز رہا۔

دریں اثنا، بہار میں نیٹ امتحان کو لے کر حالات مزید گرماتے جا رہے ہیں۔ پٹنہ سمیت کئی شہروں میں طلبہ اور نیٹ امیدواروں نے امتحان منسوخ کیے جانے پر شدید ناراضگی ظاہر کی ہے۔ طلبہ کا کہنا ہے کہ بار بار پیپر لیک ہونے سے محنتی امیدواروں کا مستقبل خطرے میں پڑ گیا ہے، جبکہ پیسے اور رسوخ کے ذریعے امتحان میں دھاندلی کرنے والے فائدہ اٹھا لیتے ہیں۔ کئی طلبہ نے مطالبہ کیا ہے کہ پیپر لیک معاملے کی تیز رفتار جانچ کر کے قصورواروں کے خلاف سخت کارروائی کی جائے۔

ادھر نالندہ ضلع میں پولیس نے امتحان سے پہلے کارروائی کرتے ہوئے کئی مشتبہ افراد کو گرفتار کیا ہے۔ پولیس کے مطابق گرفتار افراد پر پیسے لے کر امتحان میں سیٹنگ اور فرضی طریقوں سے مدد فراہم کرنے کی تیاری کا الزام ہے۔ کارروائی کے دوران موبائل فون، ایڈمٹ کارڈ اور دیگر مشتبہ دستاویزات بھی ضبط کیے گئے ہیں۔ تفتیش میں ایک میڈیکل طالب علم اُجّول راج عرف راجا بابو کا نام بھی سامنے آیا ہے، جسے اس نیٹ ورک کی اہم کڑی بتایا جا رہا ہے، حالانکہ وہ فی الحال فرار ہے۔

قومی جانچ ایجنسی پہلے ہی نیٹ یو جی 2026 امتحان منسوخ کرنے کا اعلان کر چکی ہے اور معاملے کی جانچ مرکزی تفتیشی بیورو کے سپرد کر دی گئی ہے۔ امتحان دوبارہ کرانے کی بات بھی کہی گئی ہے، تاہم نئی تاریخوں کا اعلان ابھی نہیں ہوا۔ اس پورے معاملے نے ملک بھر میں امتحانی نظام کی شفافیت اور طلبہ کے مستقبل کو لے کر نئی بحث چھیڑ دی ہے۔