’راگھو چڈھا نے عآپ کے ساتھ غداری کی ہے‘، رکن پارلیمنٹ ڈمپل یادو نے بھی باغی لیڈران کو بنایا ہدف تنقید

عآم آدمی پارٹی (عآپ) چھوڑ کر بی جے پی میں شامل ہونے والے راگھو چڈھا اور دیگر راجیہ سبھا اراکین کو لگاتار تنقید کا سامنا کرنا پڑ رہا ہے۔ سماجوادی پارٹی کی رکن پارلیمنٹ مپل یادو نے بھی اس معاملہ میں میڈیا کے سامنے اپنا سخت رد عمل ظاہر کیا ہے۔ اتر پردیش کے مین پوری سے لوک سبھا رکن ڈمپل یادو نے کہا ہے کہ راگھو چڈھا اور دیگر راجیہ سبھا اراکین نے بی جے پی میں شمولیت اختیار کر عآپ کے ساتھ غداری کی ہے۔

ڈمپل یادو نے میڈیا اہلکاروں کے سامنے عآپ کے باغی لیڈران کا ذکر کرتے ہوئے کہا کہ ’’جس پارٹی کی وجہ سے وہ رکن پارلیمنٹ بنے، سا کے ساتھ ایسا کرنا غداری بھرا قدم ہے۔‘‘ انھوں نے اپنی بات کو آگے بڑھاتے ہوئے کہا کہ ’’میں نے کل بھی یہی بات کہی تھی کہ جن لووگں کی وجہ سے، جس پارٹی کی وجہ سے آپ راجیہ سبھا تک پہنچے اور رکن پارلیمنٹ بنے، انھیں آپ نے دھوکہ دیا ہے۔ آپ عوام کے درمیان تو ووٹ مانگنے گئے نہیں تھے، نہ ہی آپ کی مقبولیت تھی، اور نہ ہی عوام نے آپ کو منتخب کر بھیجا تھا۔ آپ عآپ کی وجہ سے پارلیمنٹ پہنچے تھے، اس لیے ان کے اس قدم کو غداری ہی کہا جائے گا۔‘‘

اس سے قبل راگھو چڈھا نے ایک تازہ ویڈیو جاری کر عآپ چھوڑنے سے متعلق اپنی وضاحت نئے لفظوں کے ساتھ پیش کی ہے۔ انھوں نے کہا کہ ’’کچھ لوگ جاننا چاہتے ہیں کہ میں نے یہ فیصلہ کیوں لیا۔ آج کی یہ ویڈیو انہی لوگوں کے لیے ہے۔ میں نے چارٹرڈ اکاؤنٹینٹ کا ایک شاندار کیریئر چھوڑ کر سیاست میں قدم رکھا۔ میں عآپ کے بانی اراکین میں سے ایک تھا اور اپنی جوانی کے سب سے بہترین 15 سال عآپ کو دے دیے۔‘‘ وہ مزید کہتے ہیں کہ ’’اس پارٹی کے لیے میں نے خوب محنت کی اور خون پسینہ بہانے میں کوئی کمی نہیں چھوڑی۔ لیکن آج عآپ پہلے والی پارٹی نہیں رہی۔ پارٹی کے اندر ایک زہریلا ماحول بن چکا ہے۔ آپ کو کام کرنے سے روکا جاتا ہے۔‘‘