مودی کی جو بائیڈن سے فون پر بات چیت

امریکی صدر جو بائیڈن نے کورونا وبا کی دوسری لہر کا مقابلہ کرنے والے ہندوستان کے ساتھ اظہار یکجہتی کرتے ہوئے امریکہ کی طرف سے ضروری اشیاء کی مدد کی یقین دہانی کرائی ہے۔

وزیر اعظم نریندر مودی نے پیر کی شام کو جو بائیڈن سے ٹیلیفون پر بات کی۔ دونوں رہنماؤں نے اپنے اپنے ممالک میں کورونا وبا کی وجہ سے پیدا ہونے والی صورتحال پر تبادلہ خیال کیا۔ خاص طور پر ، ہندوستان میں کورونا کی دوسری لہر کا مقابلہ کرنے والی صورتحال سے نمٹنے کے لئے کوششیں کی جارہی ہیں۔ بات چیت کے دوران ، بائیڈن نے ہندوستان کے ساتھ یکجہتی کا اظہار کیا اور طبی وسائل کے لئے وینٹیلیٹرز اور کووی شیلڈ ویکسن کے ضروری سامان سپلائی کرنے کی بات کہی ۔

مسٹر مودی نے امریکہ کی جانب سے تعاون کی پیش کش کو سراہا۔ وزیر اعظم نے ہندوستان کے ذریعہ ویکسین فرینڈشپ اسکیم کے تحت دنیا کے متعدد ممالک میں ویکسین بھیجنے کا ذکر کیا۔دونوں رہنماؤں نے مستقبل میں بھی ایک دوسرے کے ساتھ مستقل رابطے جاری رکھنے پر اتفاق کیا۔

واضح رہے امریکی صدر نے ہندوستان کی مدد اس وقت کی ہے جبکہ ہندوستانی وزیر اعظم نے امریکہ میں ان کے سیاسی حریف ڈونالڈ ٹرمپ کی کھل کر حمایت کی تھی۔ انہو ں نے امریکہ کی ایک تقریب میں کہا تھا کہ ’اب کی بار ٹرمپ سرکار ‘جس کو سیاسی مبصرین ایک سفارتی اور سیاسی غلطی قرار دیتےہیں۔