کشمیر سے عازمین حج کی سعودی عرب کے لئے روانگی شروع

سری نگر: فریضہ حج کی ادائیگی کے لئے کشمیری عازمین کی سعودی عرب کے شہر جدہ روانگی کا سلسلہ شروع ہوگیا ہے اور سری نگر کے انٹرنیشنل ائرپورٹ سے جمعرات کو 304 عازمین پر مشتمل پہلے قافلے کو ریاستی گورنر ستیہ پال ملک نے رخصت کیا۔

سری نگر کے مضافاتی علاقہ بمنہ میں واقع سری نگر حج ہاؤس سے جمعرات کی صبح حجاج کو ایس آر ٹی سی کی مخصوص گاڑیوں کے ذریعے ائر پورٹ پہنچایا گیا۔ حجاج کرام پہلے سری نگر سے دہلی روانہ ہوں گے اور بعد ازاں دہلی سے سعودی عرب کے شہر جدہ روانہ ہوں گے۔ متعلقہ انتظامیہ نے حجاج کرام کی سہولیات کے لئے تمام تر انتظامات کیے ہیں۔

اس موقع پر حج ہاؤس سری نگر کے سی ای او ڈاکٹر عبدالسلام نے بتایا: 'امسال 11 ہزار 700 کشمیری فریضہ حج کی ادائیگی سے شرف یاب ہوں گے جن میں سے 750 دہلی سے جدہ روانہ ہوں گے جبکہ باقی سری نگر کے انٹر نیشنل ائر پورٹ سے روانہ ہوں گے'۔ ضلع مجسٹریٹ سری نگر ڈاکٹر شاہد اقبال چودھری نے میڈیا کو بتایا کہ حجاج کرام کا پہلا قافلہ سری نگر ہوائی اڈے سے جمعرات کو دو اسپائس جیٹ طیاروں کے ذریعے روانہ ہو گئے۔

انہوں نے کہا کہ سری نگر ہوائی اڈے سے 4 جولائی سے 29 جولائی تک حج پروازیں اڑان بھریں گی۔ شاہد اقبال نے کہا کہ حجاج کرام کی سہولیات کے لئے تمام تر انتظامات کو عملی شکل دی گئی ہے، انہوں نے حجاج کے احباب و اقارب سے سری نگر ائر پورٹ پر تشریف لانے سے احتراز کرنے کی اپیل کی ہے۔

حج ہاؤس سری نگر میں حجاج کرام سوئے حرم کی طرف روانہ ہونے لگے تو وہ وہاں موجود اپنے اقارب واحباب کے ساتھ آبدیدہ ہوکر بغل گیر ہو رہے تھے۔ بیشتر عازمین نے کہا کہ وہ اللہ کے گھر 'خانہ کعبہ' میں وادی میں امن وامان کی بحالی، خوشحالی اور ترقی کے لئے دعا کریں گے۔

ایک معمر عازم حج نے بتایا: 'ہم بہت خوش ہیں کہ حج پر جا رہے ہیں۔ اللہ میرا اور ہم سب کا حج قبول فرمائے۔ ہم وہاں کشمر میں امن وامان کی بحالی کے لئے دعا کریں گے۔ انتظامیہ نے حج ہاؤس میں ہمارے لئے بہترین انتظامات کیے تھے'۔ ایک خاتون عازم حج کا کہنا تھا 'ہم خوش ہیں کہ اللہ کے گھر میں حاضری دینے کے لئے جا رہے ہیں۔ اللہ تمام مسلمانوں کو حج بیت اللہ کی سعادت عطا فرمائے'۔

قبل ازیں سی ای او سٹیٹ حج کمیٹی نے ایک میٹنگ میں حج کے بارے میں تفصیلات فراہم کرتے ہوئے کہا تھا کہ اس سال ریاست سے کُل 11527 عازمین حج سفر محمود کے لئے روانہ ہو رہے ہیں جن میں جموں کے 1351 اور لداخ صوبے کے 107 عازمین شامل ہیں۔ انہوں نے مزید کہا کہ ان میں سے 10759 سری نگر جبکہ 768 عازمین سفر محمود کے لئے نئی دہلی سے روانہ ہوں گے۔

انہو ں نے کہا تھا کہ امسال 49 خادم الحجاج عازمین کی سہولیت کے لئے اُن کے ساتھ روانہ ہوں گے۔ حج ہاؤس سری نگر میں 250 عازمین کے لئے قیام و طعال کی سہولیات میسر رکھی گئی ہیں۔ ان کا مزید کہنا تھا کہ سری نگر سے 4 جولائی کو پروازوں کا سلسلہ شروع ہوگا اور یہ عمل 29 جولائی 2019 تک جاری رہے گا۔ اس موقع پر بتایا گیا تھا کہ پہلے17 دن ہر روز دو دو پروازیں روانہ ہوں گی جبکہ باقی ماندہ دنوں میں ہر روز چار چار پروازیں اڑان بھریں گی۔