گجرات: اب تک 130 فیصد بارش کے بعد بھی شدید بارش ہونے کی وارننگ جاری

گاندھی نگر: محکمہ موسمیات نے گجرات کے سوراشٹر کے اوپر کل کم دباؤ کا علاقہ بننے کے امکان کی وجہ سے آج اور آئندہ چار دنوں کے دوران ریاست کے مختلف مقامات پر شدید بارش ہونے کی وارننگ جاری کی ہے۔ اس کی وجہ سے 29ستمبر سے شروع ہونے والے ریاست کے سب سے پسندیدہ اور رنگا رنگ تہوار نوراتری کے دوران گربوں کے انعقاد میں رکاوٹ پیداہونے کے بھی پورے آثار بن گئے ہیں۔

ریاست میں اب تک 130 فیصد بارش ہوچکی ہے۔ صبح چھ بجے تک کے پچھلے 24 گھنٹے میں سبھی 33 اضلاع کے 204 تعلقہ مین بارش درج کی گئی تھی جس میں سب سے زیادہ 110 ملی میٹر سریندر نگر کے دھرانگدھرا میں ہوئی تھی۔ آج بھی دو بجے تک 22 اضلاع کے 99 تعلقہ میں بارش ہوئی ہے۔

محکمہ موسمیات نے آج جاری بلیٹن میں کہا ہے کہ سوراشٹر کے اوپر بننے والا کم دباؤ کا علاقہ اگلے 48گھنٹے میں اور مضبوط بنے گا جس کی وجہ سے ریاست میں کئی مقامات پر شدید اور بہت شدید بارش ہوگی۔آج بھی گاندھی نگر،احمدآباد ،کھیڑا اور آنند اور امریلی،بھاونگر اور گر سوم ناتھ اضلاع میں شدید سے بہت شدید بارش ہونے کی وارننگ جاری کی گئی ہے۔ سمندر میں بھی اتھل پتھل اور تیز ہواؤں کی وجہ سے ماہی گیروں کو آج اور کل گجرات ساحل سے متصل سمندر میں نہ جانے کی وارننگ دی گئی ہے۔