ہندوستان اورپاکستان کےد رمیان رشتے لگاتار خراب ہوتے جا رہے ہیں اور تازہ خبروں کے مطابق پی ایم مودی کو اپنا ائیر اسپیس دینے سے بھی پاکستان نے انکار کر دیا ہے۔ جموں و کشمیر سے دفعہ 370 ہٹائے جانے کے بعد تلملائے پاکستان نے اس ایشو کو پوری دنیا میں اٹھایا، لیکن اسے ہر جگہ سے مایوسی ہی ہاتھ لگی۔ اس کے بعد پاکستان نے ہندوستان کے لیے اپنا ائیر اسپیس بند کر رکھا ہے اور تجارتی تعلقات بھی منقطع ہیں۔ پی ایم مودی ستمبر میں ہی امریکہ کا دورہ کرنے والے ہیں اور اسی سلسلے میں ہندوستان نے پاکستان سے گزارش کی تھی کہ وہ اپنا ائیر اسپیس استعمال کرنے کی اجازت دے۔ لیکن عمران خان کی حکومت نے واضح لفظوں میں ایسا کرنے سے منع کر دیا۔
Published: 19 Sep 2019, 11:10 AM IST
قابل ذکر ہے کہ اس سے قبل پاکستان نے ہندوستانی صدر جمہوریہ رام ناتھ کووند کے طیارہ کو بھی اپنے آسمان سے گزرنے کی اجازت نہیں دی تھی، اس لیے یہ امید کی جا رہی تھی کہ پی ایم مودی کے جہاز کو بھی وہ ائیر اسپیس دینے سے انکار کرے گا، اور ایسا ہی ہوا۔ پاکستان کے اس فیصلے پر ہندوستان نے ناراضگی ظاہر کی ہے اور کہا ہے کہ اس طرح کی حرکتوں سے اسے باز آنا چاہیے ورنہ دونوں ملکوں کے رشتے خراب ہوتے چلے جائیں گے۔
Published: 19 Sep 2019, 11:10 AM IST
میڈیا ذرائع کے مطابق پاکستان کے وزیر خارجہ شاہ محمود قریشی کا کہنا ہے کہ پی ایم مودی کے طیارے کو پاکستانی ائیر اسپیس سے گزرنے کی اجازت نہیں دی گئی ہے اور اس فیصلے سے ہندوستان کو مطلع کرا دیا گیا ہے۔ انھوں نے مزید کہا کہ پاکستان حکومت کی جانب سے ہندوستانی ہائی کمیشن کو بھی اس کی جانکاری دے دی گئی ہے۔
Published: 19 Sep 2019, 11:10 AM IST
واضح رہے کہ ہندوستانی پی ایم نریندر مودی 22 ستمبر کو امریکہ میں ’ہاؤڈی مودی‘ تقریب میں حصہ لینے والے ہیں اور اس کے لیے وہ ہفتہ کے روز امریکہ روانہ ہوں گے۔ اس دورہ کے مدنظر حکومت ہند نے پاکستان سے رسمی گزارش کی تھی کہ وہ پی ایم مودی کے طیارہ کو اپنے ائیر اسپیس سے گزرنے دے۔ پاکستانی میڈیا کے مطابق عمران حکومت نے صلاح و مشورہ کے بعد پی ایم مودی کے طیارہ کو اپنے ائیر اسپیس سے اڑنے کی اجازت نہیں دی ہے۔
Published: 19 Sep 2019, 11:10 AM IST
قابل غور ہے کہ بالاکوٹ ائیر اسٹرائیک کے بعد پاکستان کا ائیر اسپیس بند ہونے کی وجہ سے ائیر انڈیا کو 2 جولائی تک 491 کروڑ روپے کا نقصان ہوا تھا۔ سول ایویشن کے وزیر ہردیپ سنگھ پوری نے راجیہ سبھا میں ایک سوال کا جواب دیتے ہوئے کہا تھا کہ پاکستان کا ائیر اسپیس بند ہونے کی وجہ سے پرائیویٹ ائیر لائنس اسپائس جیٹ کو 30.73 کروڑ، انڈیگو کو 25.1 کروڑ اور گو ائیر کو 2.1 کروڑ کا نقصان اٹھانا پڑا۔
Published: 19 Sep 2019, 11:10 AM IST
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
Published: 19 Sep 2019, 11:10 AM IST