نوئیڈا کارکنان احتجاج: آر جے ڈی ترجمان پرینکا بھارتی اور ڈاکٹر کنچنا یادو پر ایف آئی آر درج، ’فیک نیوز‘ پھیلانے کا الزام

نوئیڈا میں جاری مزدوروں کے احتجاج کے درمیان اب ایک نیا موڑ آ گیا ہے۔ جہاں نوئیڈا کے سائبر تھانہ پولیس نے 14 اپریل کو مختلف سوشل میڈیا پلیٹ فارم پر غلط اور اشتعال انگیز ویڈیو ڈالنے کے معاملے میں پرینکا بھارتی اور ڈاکٹر کنچنا یادو سمیت کئی لوگوں پر ایف آئی آر درج کی ہے۔ پولیس تحقیقات میں یہ بات سامنے آئی ہے کہ ملزمان نے 11 اپریل 2026 کی مدھیہ پردیش کے شہڈول ضلع کی ایک پرانی ویڈیو کو نوئیڈا کا بتا کر شیئر کیا تھا، جس میں پولیس کو ایک شخص کے ساتھ مار پیٹ کرتے ہوئے دیکھا گیا تھا۔ اس کے علاوہ انہوں نے سوشل میڈیا پلیٹ فارم ’ایکس‘ پر سیکٹر 62 میں آتشزدگی کی جھوٹی ویڈیو پھیلائی۔ اس سوچی سمجھی سازش کا مقصد نوئیڈا کے شہریوں میں انتظامیہ کے تئیں مزید خوف پیدا کرنا تھا۔

پولیس کے مطابق تحقیقات میں گمراہ کن معلومات پھیلانے کے معاملے میں راشٹریہ جنتا دل (آر جے ڈی) کی 2 قومی ترجمان پرینکا بھارتی اور ڈاکٹر کنچنا یادو کے خلاف بھی نوئیڈا پولیس نے مقدمہ درج کیا ہے۔ الزام ہے کہ انہوں نے غلط ویڈیو کو نوئیڈا کا بتا کر شیئر کیا، جس سے مختلف علاقوں میں خوف اور عدم یقین کا ماحول بنا۔ پولیس افسران کے مطابق اس پوسٹ میں منصوبہ بند طریقے سے اشتعال انگیز اور گمراہ کن معلومات پھیلا کر پولیس کی شبیہ کو خراب کرنے اور امن و امان کو متاثر کرنے کی کوشش کی گئی تھی۔ اس معاملے میں ملزمان کے خلاف بی این ایس کی دفعہ 353 (1) (بی) اور آئی ٹی ایکٹ کی دفعہ 66 اور 66 ڈی کے تحت سخت کارروائی کی جا رہی ہے۔

دوسری جانب اس سے قبل پولیس کے پاس احتجاج کے متعلق آئی ’چیٹ‘ میں یہ بھی کہا گیا ہے کہ جب تک ان کے مطالبات پر سماعت نہیں ہوتی، تب تک ہڑتال جاری رکھی جائے۔ لاٹھی چارج کے بعد بھی دوبارہ اکٹھا ہونے کی اپیل والی آڈیو نے انتظامیہ کی تشویش میں مزید اضافہ کر دیا ہے۔ پولیس انتظامیہ اس پورے معاملہ کو سنجیدگی سے لیتے ہوئے تحقیقات میں مصروف ہو گئی ہے۔ وائرل آڈیو اور چیٹ کی صداقت کی جانچ کی جا رہی ہے۔ ساتھ ہی یہ بھی معلوم کرنے کی کوشش کی جا رہی ہے کہ ان پیغامات کو پھیلانے کے پیچھے کون لوگ ہیں اور ان کا مقصد کیا ہے۔

افسران کا کہنا ہے کہ اگر کسی بھی شخص کا کردار اشتعال انگیز سرگرمیوں میں پایا جاتا ہے تو اس کے خلاف سخت قانونی کارروائی کی جائے گی۔ اس درمیان پولیس نے مزدوروں سے امن برقرار رکھنے اور کسی بھی افواہ یا اشتعال انگیز پیغام پر توجہ نہ دینے کی اپیل کی ہے۔ انتظامیہ کا کہنا ہے کہ تمام مسائل کا حل بات چیت کے ذریعہ نکالا جائے گا، اس لیے لا اینڈ آرڈر کو بگاڑنے کی کوشش کرنے والوں کے ساتھ سختی سے نمٹا جائے گا۔ نوئیڈا میں موجودہ حالات کے پیش نظر سیکورٹی سخت کر دی گئی ہے اور حساس علاقوں میں اضافی پولیس فورس تعینات کی گئی ہے، تاکہ کسی بھی ناخوشگوار واقعہ کو روکا جا سکے۔