نوی ممبئی میں سائبر ٹھگوں کا نیا کھیل: گیس کنکشن بند کرنے کی دھمکی دے کر 10 لاکھ کی ٹھگی

سائبر ٹھگوں نے نوی ممبئی میں دھوکہ دہی کا ایک نیا طریقہ اپنایا ہے۔ اب وہ گیس بحران کا فائدہ اٹھا کر لوگوں کو گیس کنکشن بند کرنے کی دھمکی دے کر ٹھگ رہے ہیں۔ کوپر خیرانے پولیس اسٹیشن علاقہ میں ایک شخص سے 10 لاکھ 30 ہزار روپے کی ٹھگی کا معاملہ سامنے آیا ہے۔ پولیس کے مطابق گھنسولی کے رہنے والے اشرف گائن کو ایک فون آیا۔ فون کرنے والے شخص نے خود کو مہانگر گیس لمٹڈ (ایم جی ایل) ایجنسی کا افسر بتایا اور کہا کہ ان کا گیس بل نہیں پہنچا ہے، اس لیے ان کا گیس کنکشن بند کیا جا رہا ہے۔ پریشان ہو کر اشرف نے آن لائن پیمنٹ کرنے کی بات کہی۔

ٹھگوں نے فوراً دوسرے نمبر سے ایک فائل بھیجی اور اسے ڈاؤنلوڈ کرنے کو کہا۔ جیسے ہی اشرف نے فائل ڈاؤنلوڈ کی، ان کے موبائل میں ایک ’میلویر‘ ایپ انسٹال ہو گیا۔ ٹھگوں نے اس ایپ کے ذریعہ ان کے موبائل کا پورا کنٹرول حاصل کر لیا اور ان کے بینک کھاتے سے 10 لاکھ 30 ہزار روپے ٹرانسفر کر لیے۔ پیسے کٹنے کا میسج ملنے پر اشرف نے فوراً کوپر خیرانے پولیس اسٹیشن پہنچ کر شکایت درج کرائی۔ پولیس نے نامعلوم ملزمان کے خلاف کیس درج کر تحقیقات شروع کر دی ہے۔

واضح رہے کہ چند روز قبل بھی اس علاقہ میں ٹھگی کا ایک معاملہ سامنے آیا تھا۔ 5 اپریل کو کوپر خیرانے میں رہنے والے 72 سالہ اجے نامی شخص کے ساتھ بھی اسی طریقے سے ٹھگی ہوئی تھی۔ ٹھگوں نے انہیں بھی ایک فائل بھیج کر موبائل کا ایکسیس حاصل کیا اور ان کے بینک اکاؤنٹ سے 2 لاکھ 23338 روپے نکال لیے تھے۔ پولیس نے بتایا کہ دونوں معاملات میں ٹھگوں نے گیس کی قلت اور بل کی ادائیگی کا بہانہ بنایا۔ انہوں نے لوگوں سے اپیل کی ہے کہ کسی بھی نامعلوم نمبر سے آنے والے میسج یا فون پر بھروسہ نہ کریں۔ خاص طور پر کسی بھی فائل یا لنک کو ڈاؤنلوڈ نہ کریں۔

پولیس نے لوگوں کو مشورہ دیا ہے کہ گیس بل یا کسی بھی کمپنی سے متعلق مسئلہ ہونے پر براہ راست آفیشل کسٹمر کیئر نمبر پر رابطہ کریں۔ کوئی بھی آن لائن پیمنٹ لنک یا ایپ صرف آفیشل ویب سائٹ یا ایپ سے ہی ڈاؤنلوڈ کریں۔ نوی ممبئی پولیس نے علاقے میں سائبر ٹھگی کے بڑھتے ہوئے واقعات کو دیکھتے ہوئے لوگوں کو بیدار کرنے کے لیے مہم شروع کرنے کا فیصلہ کیا ہے۔