"مٹھیاں جب بندھ جاتی ہیں نوجوانوں کی، نیند اڑ جاتی ہے ظلمی حکمرانوں کی"

ہندوستان میں پھیلی بے روزگاری اور مودی حکومت کے خلاف اپوزیشن پارٹیوں کی آوازیں دن بہ دن تیز ہوتی جا رہی ہیں۔ کچھ تنظیموں و پارٹیوں نے ملک میں بڑھتی بے روزگاری کے خلاف آواز اٹھاتے ہوئے آج (9 ستمبر) رات 9 بجے 9 منٹ کے لیے گھروں کی بتیاں بجھا کر احتجاج ظاہر کرنے کا اعلان کر رکھا ہے۔ سماجوادی پارٹی بھی اس مہم میں شریک ہو رہی ہے اور اکھلیش یادو نے ٹوئٹ کر سبھی سے اپیل کی ہے کہ وہ آج رات 9 بجے سے 9 منٹ کے لیے اپنے گھروں کی بتیاں بجھا دیں۔

اکھلیش یادو نے اپنے ٹوئٹ میں بے روزگار نوجوانوں کو انقلاب پیدا کرنے کے لیے حوصلہ افزائی کی ہے اور کہا ہے کہ "مٹھیاں جب بندھ جاتی ہیں نوجوانوں کی، نیند اڑ جاتی ہے ظلمی حکمرانوں کی"۔ ساتھ ہی انھوں نے یہ بھی لکھا ہے کہ "آئیے نوجوانوں و ان کے خاندانوں کی بے روزگاری-بے کاری کے اس اندھیرے میں ہم آج رات 9 بجے، 9 منٹ کے لیے بتیاں بجھا کر انقلاب کی مشعل جلائیں، ان کی آواز میں آواز ملائیں۔"