جھارکھنڈ کے وزیر اعلیٰ ہیمنت سورین کی والدہ روپی سورین کا انتقال

جھارکھنڈ کے وزیر اعلیٰ ہیمنت سورین کی والدہ روپی سورین کا کل یعنی7 اکتوبر کو رانچی کے ایک اسپتال میں انتقال ہو گیا۔ انہیں 18 ستمبر کو سانس لینے میں تکلیف کی شکایت کے بعد اسپتال میں داخل کرایا گیا تھا۔ کل  ان کی حالت اچانک بگڑ گئی جس کے بعد انہیں وینٹی لیٹر پر رکھا گیا۔ اپنی ماں کے انتقال پر غم کا اظہار کرتے ہوئے وزیر اعلیٰ ہیمنت سورین نے ایک ای میل میں لکھا کہ بابا کے جانے کے بعد ان کی ماں ہی ان کا سب سے بڑا سہارا تھا۔ آج وہ سپورٹ سسٹم بھی فطرت میں ضم ہو گیا ہے۔ وزیر اعلیٰ  کے والد شیبو سورین کا 4 اگست 2025 کو انتقال ہوگیا تھا۔

روپی سورین کے انتقال کی خبر سے خاندان، قریبی ساتھیوں اور حامیوں میں غم کی لہر دوڑ گئی ہے۔ کئی سیاسی و سماجی شخصیات نے تعزیت کا اظہار کیا۔جھارکھنڈ کے ایم ایل اے سریو رائے نے اپنی انسٹاگرام پوسٹ میں لکھا، "ہمارے پیارے وزیر اعلیٰ ہیمنت سورین کی قابل احترام والدہ کے انتقال کی خبر دل دہلا دینے والی ہے، انہوں نے ایک کامیاب زندگی گزاری، وہ اپنے پیچھے ایک مکمل خاندان اور ہزاروں لوگوں کی میراث چھوڑ گئی ہیں اورانہیں ہمیشہ یاد رکھا جائے گا۔ خدا مرحوم کی روح کو سکون عطا فرمائے اور تمام اہل خانہ کو صبر جمیل عطا فرمائے"۔

جھارکھنڈ کے سابق وزیر اعلی چمپائی سورین نے بھی روپی سورین کے انتقال پر تعزیت کا اظہار کیا۔ انہوں نے لکھا، " آنجہانی شیبو سورین کی اہلیہ روپی سورین کے انتقال کی افسوسناک خبر گہرا دکھ پہنچانے والی ہے۔ جھارکھنڈ تحریک کے وقت کے بہت سے واقعات اور یادیں میری آنکھوں کے سامنے جھلک رہی ہیں۔ مرحوم کی روح کو سکون دے اور خاندان کو یہ نقصان برداشت کرنے کی طاقت دے۔‘‘

کانگریس رہنما امبا پرساد نے انسٹاگرام پر اپنی تعزیت کا اظہار کرتے ہوئے لکھا، "جھارکھنڈ کے وزیر اعلیٰ ہیمنت سورین کی والدہ روپی سورین کے انتقال کی خبر انتہائی افسوسناک ہے۔ خدا مرحوم کی روح کو اپنے قدموں میں جگہ دے اور وزیر اعلیٰ ہیمنت سورین اور پورے سوگوار خاندان کو یہ نقصان برداشت کرنے کی طاقت دے۔"