بڑکلی چوک دھرنا: سی اے اے کی مخالفت کرنا ہندوستان کے ہر طبقہ پر فرض، سردار نرنجن سنگھ

نوح میوات: بڑکلی چوک پر شہریت ترمیمی قانون، این آر سی اور این پی آر کے خلاف دھرنا نویں روز بھی بدستور جاری رہا۔ بعد نماز جمعہ کثیر تعداد میں لوگ دھرنا میں شریک ہوئے۔ میوات وکاس سبھا تنظیم و آر ٹی آئی فورم کے زیر انتظام چل رہے اس احتجاج میں وقفہ وقفہ پر علاقہ میوات کے تمام سر گرم سماجی کارکنان سمیت بیرون میوات سے بھی بلا تفریق لوگ شامل ہو کر یکجہتی کا اظہار کر رہے ہیں۔

بڑکلی چوک کے دھرنے کو ختم کرنے کی پولس کی طرف سے کافی کوششیں کی گئیں اور مظاہرین کے خلاف مقدمات بھی قائم کئے گئے لیکن مظاہرین نڈر نظر آ رہے ہیں اور احتجاج پر ڈٹے ہوے ہیں۔ اس دھرنے میں مردوں کے ساتھ خواتین بھی شانہ بشانہ نظر آتی ہیں۔ نماز جمعہ کے بعد کثیر تعداد میں خواتین نے دھرنے میں شرکت کی۔

بڑکلی چوک دھرنے سے خطاب کرتے ہوئے علاقہ کی معزز ہستی حاجی اصغر کھیڑلی نے لوگوں سے زیادہ سے زیادہ تعداد میں دھرنے میں شرکت کرنے کی اپیل کی۔ انہوں نے کہا کہ بڑکلی چوک کا دھرنا تمام طبقات کے مفاد اور بہتری کے لیے ہے، لہذا اس میں بڑھ چڑھ کر شامل ہوں۔ نیز یہ ملک کے ہر شہری کی لڑائی ہے۔

شاہین باغ کی طرح بڑکلی چوک کا دھرنا بھی مذہبی ہم آہنگی کی تصویر نظر آتا ہے، پلول آشرم سے سوامی دھرمانند اور ہرپلی گاؤں کے سرپنچ سردار نرنجن سنگھ نے یہاں کے مظاہرین کو بھرپور حمایت دینے کا اعلان کیا ہے۔

ہرپلی گاؤں کے سرپنچ سردار نرنجن سنگھ نے کہا کہ یہ شہریت ترمیمی قانون صرف مسلمانوں کے ہی خلاف نہیں ہے بلکہ ملک کے ہر طبقہ کے لئے خطرناک ہے۔ انہوں نے کہا کہ مسلمانوں کے خلاف اس طرح کا قانون بنا کر حکومت دیگر طبقات کی نبض ٹٹولنے کا کام کر رہی ہے اور بی جے پی جلد ہی سکھ، عیسائی، بودھ اور دلتوں کے خلاف بھی اس طرح کے قوانین لانے کی تیاری کر رہی ہے۔ انہوں نے کہا کہ شہریت ترمیمی قانون اور این آر سی و این آر پی کی مخالفت کرنا ہندوستان کے ہر طبقہ کا فرض بن چکا ہے۔

ریاست ہریانہ کانگریس پارٹی کے حزب اختلاف کے لیڈر آفتاب احمد نے بھی دھرنے میں شرکت کی۔ آفتاب احمد نے اپنی اور کانگریس پارٹی کی طرف میوات کے بڑکلی چوک پر جاری غیر معینہ مدت کے دھرنا کو پوری حمایت دینے کا اعلان کیا۔ انہوں نے کہا کہ موجودہ حالات میں جس طرح سے میواتیوں نے شہریت ترمیمی قانون کے خلاف کھڑے ہوکر زندہ دلی کا ثبوت دیا ہے، اس سے میوات کی ماضی کی تاریخ کی یادیں تازہ ہو گئیں۔

ریاست ہریانہ یونٹ کے مسلم پسماندہ محاذ کے صدر ظفرو الدین الیاسی نے بھی بڑکلی چوک دھرنا میں شرکت کی۔ اپنے خطاب میں انہوں نے کہا ’’بڑکلی چوک پر میوات وکاس سبھا کے زیر اہتمام جاری دھرنا تاریخ رقم کرے گا۔ میوات نے ہر دور میں ہر موقع پر ہمیشہ بڑھ چڑھ کر قربانیاں دی ہیں اور آج ایک بار پھر اس قانون کے خامیوں کو یہ سمجھ لینا چاہئے کہ میوات کا ہر طبقہ اب بیدار ہو چکا ہے۔‘‘

وہیں (راجستھان) کے میوات امروکا چوک دھرنا آج چوتھے روز بھی جاری رہا، جس میں سینکڑوں کی تعداد میں لوگ علاقہ کی با اثر شخصیت عالم دین مولانا ارشد قاسمی میل کھیڑلا کی قیادت میں احتجاج کر رہے ہیں۔ جمعہ کے بعد بڑی تعداد میں لوگ احتجاج میں شامل ہوئے اور حکومت کی طرف سے لائے گئے سی اے اے کے خلاف صدائے احتجاج بلند کی۔