مدھیہ پردیش: دگ وجے سنگھ نے وزیر اعلیٰ موہن یادو سے مونگ کی خریداری جلد شروع کرنے کا کیا مطالبہ

مدھیہ پردیش کے سابق وزیر اعلیٰ اور کانگریس کے سینئر رہنما دگ وجے سنگھ نے موسم گرما کی مونگ کی خریداری سے متعلق زرعی شعبے میں پیدا ہونے والے بحران کو دور کرنے کے لیے وزیر اعلیٰ موہن یادو سے رسمی طور پر رابطہ کیا ہے۔ دگ وجے سنگھ نے اپنے خط میں لکھا کہ رواں سال فصل کی بوائی میں 15 سے 20 فیصد اضافہ ہوا ہے۔ تجربہ کار کانگریسی رہنما نے خبردار کیا ہے کہ مارکیٹ کے موجودہ رجحانات ریاست کی کسان برادری کے لیے ممکنہ معاشی بحران کا اشارہ دے رہے ہیں۔

دگ وجے سنگھ کے مطابق مدھیہ پردیش کے مختلف علاقوں میں موسم گرما کی مونگ کی فصل اب مکمل طور پر پک کر تیار ہو چکی ہے اور آنے والے دنوں میں منڈیوں میں پیداوار کی بھاری آمد متوقع ہے۔ اسی لیے خریداری کا عمل جلد شروع کر دینا چاہیے۔ انہوں نے کہا کہ حکومت کی فوری مداخلت کے بغیر، کسان اپنی محنت سے اگائی گئی فصل کو ایسی قیمتوں پر بیچنے پر مجبور ہو جائیں گے جو ان کی بنیادی پیداواری لاگت کو بھی پورا نہیں کر پائیں گی۔

ریاستی زرعی مشاورتی کونسل کے سابق رکن کیدار سروہی کے ذریعہ دی گئی معلومات کا حوالہ دیتے ہوئے دگ وجے سنگھ نے بتایا کہ ریاستی انتظامیہ کی جانب سے فعال اقدامات کی کمی خاص طور پر تشویشناک ہے۔ انہوں نے ایک اہم انتظامی کوتاہی کی نشاندہی کرتے ہوئے کہا کہ مدھیہ پردیش حکومت نے اب تک مرکزی حکومت کو اپنی سالانہ خریداری کی تجویز پیش نہیں کی ہے۔ عام طور پر، یہ تجویز ’پرائس سپورٹ اسکیم‘ کے تحت اجازت اور فنڈ حاصل کرنے کے لیے ایک لازمی شرط ہے، جو کم از کم امدادی قیمت (ایم ایس پی) پر بڑے پیمانے پر سرکاری خریداری کی اجازت دیتی ہے۔

وزیر اعلیٰ موہن یادو کو لکھے گئے خط میں اس بات پر بھی زور دیا گیا ہے کہ ہزاروں کسانوں کا روزگار ان خریداری مراکز کے بروقت آغاز پر منحصر ہے۔ ریاستی اور مرکزی افسران کے درمیان ہم آہنگی میں کسی بھی قسم کی مزید تاخیر دیہی آبادی کے مفادات پر براہ راست حملہ کے مترادف ہے۔ دگ وجے سنگھ کے مطابق رواں سال اب تک مرکز کو کوئی تجویز  نہیں بھیجی گئی ہے۔ انہوں نے وزیر اعلیٰ موہن یادو سے گزارش کی کہ ریاست کے کسانوں کو ان کی محنت کا مناسب اور منافع بخش منافع مل سکے، اس کے لیے ضروری اجازت نامے جلد از جلد جاری کیے جائیں۔