مغربی ایشیا کی جنگ کا اثر: چنئی میں ایل پی جی اور سی این جی کی کمی، آٹو رکشہ خدمات متاثر

چنئی: مغربی ایشیا میں جاری جنگ کے باعث ایندھن کی سپلائی متاثر ہونے کا اثر اب چنئی کے ٹرانسپورٹ شعبے پر بھی واضح طور پر نظر آنے لگا ہے۔ شہر میں ہزاروں آٹو رکشہ ڈرائیوروں کو ایل پی جی اور سی این جی سے چلنے والی اپنی گاڑیوں میں ایندھن بھرنے میں دشواری کا سامنا ہے جبکہ مسافروں کو بڑھتے ہوئے کرایوں کی صورت میں اضافی بوجھ اٹھانا پڑ رہا ہے۔

آٹو رکشہ ڈرائیوروں کا کہنا ہے کہ گیس کی سپلائی غیر یقینی ہوگئی ہے جس کی وجہ سے انہیں گیس اسٹیشنوں پر گھنٹوں انتظار کرنا پڑ رہا ہے۔ کئی ڈرائیوروں کے مطابق گزشتہ چند دنوں میں صورتحال مزید خراب ہوئی ہے اور بعض مقامات پر گیس حاصل کرنا انتہائی مشکل ہوگیا ہے۔

آٹو رکشہ ڈرائیوروں کی تنظیم کے نمائندوں کے مطابق منگل کے روز گیس پر چلنے والے تقریباً ایک چوتھائی آٹو رکشہ ایندھن حاصل کرنے میں ناکام رہے۔ تنظیم نے خدشہ ظاہر کیا ہے کہ اگر سپلائی جلد بہتر نہ ہوئی تو صورتحال مزید پیچیدہ ہوسکتی ہے۔

تمل ناڈو آٹو تھوزلالارگل سمّیلنم کے ریاستی ایگزیکٹو صدر ایس بالاسبرامنیم نے کہا کہ تقریباً 25 فیصد گیس آٹو بدھ کے روز ایندھن حاصل نہیں کرسکے۔ ان کے مطابق اگر یہی صورتحال برقرار رہی تو یہ تعداد مزید بڑھ سکتی ہے اور آٹو خدمات شدید متاثر ہوسکتی ہیں۔

ڈرائیوروں نے یہ بھی شکایت کی کہ سپلائی کی کمی کے ساتھ ساتھ کئی نجی آؤٹ لیٹس پر زیادہ قیمت وصول کی جارہی ہے۔ سرکاری طور پر ایل پی جی کی قیمت تقریباً 59 روپے فی کلوگرام ہے، تاہم بعض مقامات پر اسے 70 سے 80 روپے فی کلوگرام تک فروخت کیا جارہا ہے۔ تیل کمپنیوں کے بعض آؤٹ لیٹس پر بھی قیمت بڑھ کر 64 روپے سے زیادہ فی کلوگرام تک پہنچ گئی ہے۔

ایندھن کی قیمت میں اضافے اور قلت کے باعث کئی ڈرائیور، جنہوں نے کم خرچ کی وجہ سے گیس گاڑیوں کا انتخاب کیا تھا، اب مجبوراً پٹرول استعمال کر رہے ہیں۔ اس تبدیلی سے ان کی روزانہ کی آمدنی متاثر ہورہی ہے کیونکہ پٹرول پر خرچ زیادہ آتا ہے۔

چنئی کے ایک آٹو ڈرائیور کے راجیش نے بتایا کہ انہوں نے بہتر مائلیج اور کم خرچ کے باعث سی این جی گاڑی اختیار کی تھی، لیکن اب گیس حاصل کرنا مشکل ہوگیا ہے۔ انہوں نے عارضی طور پر پٹرول استعمال کرنا شروع کردیا ہے جس سے ان کی آمدنی کم ہوگئی ہے۔

اس صورتحال سے مسافر بھی متاثر ہو رہے ہیں۔ کئی علاقوں میں آٹو رکشہ کے کرایوں میں نمایاں اضافہ دیکھنے میں آیا ہے۔ مسافروں کے مطابق چنئی سینٹرل سے ایگمور تک کا کرایہ پہلے کے مقابلے میں تقریباً 40 روپے زیادہ ہوگیا ہے جبکہ بعض دیگر راستوں پر بھی کرایوں میں خاطر خواہ اضافہ ہوا ہے۔

گیس اسٹیشنوں پر لمبی قطاریں عام منظر بن چکی ہیں اور بعض مقامات پر ڈرائیوروں کو دو دو گھنٹے انتظار کرنا پڑ رہا ہے۔ اسٹیشن آپریٹروں کا کہنا ہے کہ سپلائی کم ہونے کے باعث انہیں بھی مالی نقصان اٹھانا پڑ رہا ہے۔ اگر ایندھن کی سپلائی جلد بحال نہ ہوئی تو شہر کے ٹرانسپورٹ نظام اور کاروباری سرگرمیوں پر اس کے مزید منفی اثرات مرتب ہوسکتے ہیں۔