ایوان سے غیر حاضر مرکزی وزیر جیتن رام مانجھی پر لوک سبھا اسپیکر ہوئے غصہ، پارلیمانی امور کے وزیر کو کیا خبردار

پارلیمنٹ میں جاری بجٹ اجلاس میں وزارت سے متعلق سوال پوچھے جانے کے دوران ایوان میں مرکزی وزیر جیتن رام مانجھی کی عدم موجودگی پر لوک سبھا اسپیکر اوم برلا نے سخت برہمی کا اظہار کیا۔ اس کے ساتھ ہی کچھ اراکین کے دیر تک بات چیت میں مصروف رہنے پر بھی اسپیکر نے ناراضگی ظاہر کی۔ آج (جمعرات) وقفہ سوالات کے دوران ایک ضمنی سوال پوچھا جانا تھا۔ یہ سوال مائیکرو، اسمال اینڈ میڈیم انٹرپرائزز وزارت (ایم ایس ایم ای) وزارت سے متعلق تھا لیکن اس وقت مرکزی وزیر جیتن رام مانجھی ایوان میں موجود نہیں تھے۔ اتنا ہی نہیں ان کے نائب وزیرمملکت بھی غیر حاضر تھے جس پر اسپیکر نے ان کی سخت سرزنش کی۔

لوک سبھا اسپیکر اوم برلا نے مرکزی وزیر اور ان کے نائب کے غیر حاضر رہنے پر ناراضگی کا اظہارکرتے ہوئے پارلیمانی امور کے وزیر کرن رجیجو سے کہا کہ وہ اس معاملے کو نوٹس میں لیں اور تنبیہ کی کہ آئندہ ایسا نہ ہو، یہ یقینی بنائیں۔ اسی دوران اسپیکر نے پوچھا کہ ایم ایس ایم ای کے وزیر مملکت کون ہیں؟ وزیر مملکت کے بھی غیر حاضر رہنے کا نوٹس لینے کے بعد اوم برلا نے پارلیمانی امور کے وزیر سے اس معاملے کو دھیان میں رکھنے کو کہا۔ انہوں نے خبردار کیا کہ دوبارہ ایسا نہیں ہونا چاہئے۔

وقفہ صفر کے آغاز پر اسپیکر نے کہا کہ اجلاس کے دوران انہوں نے کئی ارکان اور وزراء کو کھڑے ہو کر طویل بات چیت کرتے ہوئے دیکھا ہے۔ انہوں نے کہا کہ ضرورت پڑنے پر وہ صرف ایک یا دو منٹ تک بات کر سکتے ہیں۔ انہیں لمبی بات چیت نہیں کرنی چاہیے۔ برلا نے خبردار کیا کہ وہ مستقبل میں ایسا کرنے والوں کا نام لیں گے۔

قبل ازیں وقفہ سوالات کے دوران اسپیکر نے آزاد رکن پارلیمنٹ پپو یادو کو بھی ٹوکا۔ انہوں نے کہا کہ پپو یادو نشست (اسپیکر کی طرف) پیٹھ  کرکے کافی دیر تک دوسرے رکن سے بات کرتے رہے ہیں۔ اسپیکر نے کہا کہ آپ یو سینئر رکن ہیں، ایسا رویہ نہیں اختیار کرنا چاہئے۔ اسپیکر نے کہا کہ ایوان کا وقاربرقرار رکھنا سب کی ذمہ داری ہے۔ تمام اراکین اور وزراء کو اس پر عمل کرنا چاہیے۔