سکم میں لینڈ سلائیڈنگ اور گیس کے اخراج کے بعد متعدد  مزدور سرنگ میں پھنسے

سکم کے نامچی ضلع میں کل یعنی  پیر کی دوپہر کو لینڈ سلائیڈنگ نے زیر تعمیر سڑک سرنگ کے دروازے کو بند کر دیا، جس سے کئی مزدور پھنس گئے۔ پولیس کے مطابق لینڈ سلائیڈنگ کے بعد ٹنل کے اندر گیس کا اخراج بھی شروع ہوا جس سے ریسکیو آپریشن مزید مشکل ہو گیا۔ پولیس حکام نے بتایا کہ یہ شبہ ہے کہ لینڈ سلائیڈنگ کی وجہ سے زیر زمین چٹان اور زمینی تہہ منتقل ہو گئی جس سے قدرتی گیس کا اخراج ہوا۔ گیس کی موجودگی نے سرنگ میں داخل ہونا انتہائی خطرناک بنا دیا ہے۔

نیشنل ڈیزاسٹر ریسپانس فورس (این ڈی آر ایف)، اسٹیٹ ڈیزاسٹر ریسپانس فورس (ایس ڈی آر ایف)، پولیس، فائر اور ایمرجنسی سروسز کی ٹیمیں مل کر پھنسے ہوئے کارکنوں کو بحفاظت نکالنے کے لیے راحت اور بچاؤ کی کارروائیاں کر رہی ہیں۔ تاہم، سرنگ کے اندر گیس آپریشن میں رکاوٹ بن رہی ہے۔

ایک پولیس اہلکار نے بتایا کہ پھنسے ہوئے کارکنوں تک پہنچنے کی کوشش کے دوران کئی امدادی کارکن گیس کے اثرات کی وجہ سے چکرا کر بے ہوش ہوگئے۔ ایمبولینسز کو احتیاط کے طور پر تعینات کر دیا گیا ہے، جبکہ گیس ماسک سے لیس خصوصی ریسکیو ٹیمیں سرنگ میں داخل ہونے اور کارکنوں تک پہنچنے کی کوشش کر رہی ہیں۔ حکام کے مطابق یہ سرنگ قومی شاہراہ کے ایک منصوبے کے تحت زیر تعمیر ہے۔ فی الحال راحت اور بچاؤ کا کام جنگی بنیادوں پر جاری ہے اور انتظامیہ کی ترجیح سرنگ میں پھنسے تمام مزدوروں کو بحفاظت باہر نکالنا ہے۔