اسلام جمخانہ کے صدر ایڈوکیٹ یوسف ابراہانی 100 بااثر ہندوستانی مسلمانوں میں شامل

ممبئی کے معروف ادارے اسلام جمخانہ کے صدر اور سابق رکنِ اسمبلی ایڈوکیٹ یوسف ابراہانی کو سال 2025 کے لیے 100 بااثر ہندوستانی مسلمانوں کی فہرست میں شامل کیا گیا ہے۔ یہ فہرست ہر سال دہلی سے شائع ہونے والے معروف جریدے مسلم مِرر کی جانب سے جاری کی جاتی ہے۔

مسلم مِرر کی جانب سے جاری کردہ اس فہرست میں اُن شخصیات کو شامل کیا جاتا ہے جنہوں نے مختلف شعبوں میں نمایاں خدمات انجام دے کر قومی سطح پر اثرات مرتب کیے ہوں۔ ایڈوکیٹ یوسف ابراہانی کو کمیونٹی لیڈر شپ کے زمرے میں شامل کیا گیا ہے، جہاں مذہبی رہنمائی، قانونی و سماجی خدمات اور ادارہ جاتی قیادت میں ان کے کردار کو سراہا گیا ہے۔

ایڈوکیٹ یوسف ابراہانی ممبئی کے سماجی اور سیاسی حلقوں میں ایک معروف نام ہیں۔ وہ دو مرتبہ میونسپل کارپوریٹر منتخب ہوئے اور بعد ازاں ممبئی کے مضافاتی علاقے مانخورد–شیواجی نگر اسمبلی حلقے سے رکنِ اسمبلی رہے۔ اس کے علاوہ وہ مہاراشٹر ہاؤسنگ اینڈ ایریا ڈیولپمنٹ اتھارٹی (ایم ایچ اے ڈی اے) کے چیئرمین کی حیثیت سے بھی خدمات انجام دے چکے ہیں۔

سماجی سطح پر ایڈوکیٹ یوسف ابراہانی مختلف فلاحی اور اصلاحی سرگرمیوں سے وابستہ رہے ہیں۔ ان کی جانب سے شروع کی گئی ملک گیر مہم “پرافٹ فار آل” کا مقصد حضور اکرم ﷺ کی تعلیمات کو عام کرنا اور مختلف طبقات کے درمیان ہم آہنگی کو فروغ دینا ہے۔ وہ خدمت فاؤنڈیشن کے ذریعے کینسر کے مریضوں کی مدد اور کم آمدنی والے ائمہ مساجد کی اعانت کے کاموں میں بھی سرگرم ہیں۔

حال ہی میں انہوں نے مہنگی اور فضول خرچی پر مبنی شادیوں کے بڑھتے رجحان کے خلاف ایک سماجی بیداری مہم کا آغاز بھی کیا ہے۔نمائندے سے گفتگو کرتے ہوئے ایڈوکیٹ یوسف ابراہانی نے کہا کہ انہیں اس اعزاز کی اطلاع چند جاننے والوں کے ذریعے ملی۔ انہوں نے کہا کہ ملک کی ممتاز شخصیات کے درمیان اپنا نام شامل ہونا باعثِ مسرت ہے، تاہم اس کے ساتھ سماجی ذمہ داریوں میں بھی اضافہ ہو جاتا ہے۔ انہوں نے عزم ظاہر کیا کہ وہ آئندہ بھی سماجی خدمت کے کاموں کو پوری سنجیدگی کے ساتھ جاری رکھیں گے۔

واضح رہے کہ ایڈوکیٹ یوسف ابراہانی متعدد معروف تنظیموں سے وابستہ ہیں اور کئی سماجی اداروں کی درپردہ مدد بھی کرتے رہے ہیں۔ وہ سیوا تنظیم کے صدر بھی ہیں، جو ممبئی اور اطراف کے علاقوں میں تعلیم کے میدان میں سرگرم ہے۔ اس تنظیم کے تحت غریب اور نادار طلبہ و طالبات کو تعلیم کے ساتھ کتابیں، یونیفارم اور دیگر تعلیمی لوازمات فراہم کیے جاتے ہیں۔

انہوں نے بتایا کہ گلوبل کیئر فاؤنڈیشن کے ذریعے وہ پہلی مرتبہ جرم کرنے والے غیر عادی ملزمین کی ضمانت اور ان کی سماجی بازآبادکاری میں مدد کرتے ہیں۔ اس کے علاوہ ایسے افراد کی رہائی کے لیے بھی قانونی معاونت فراہم کی جاتی ہے جن کی سزا مکمل ہو چکی ہو مگر قانونی یا عدالتی پیچیدگیوں کے باعث رہائی ممکن نہ ہو سکی ہو۔

اسی طرح امید فاؤنڈیشن کے ذریعے ذہنی و جسمانی طور پر معذور بچوں کی تعلیم اور تربیت میں بھی مدد فراہم کی جاتی ہے۔ ایڈوکیٹ ابراہانی نے لاتور اور مہاراشٹر کے دیگر اضلاع میں خشک سالی سے متاثرہ، بالخصوص غیر مسلم کسان خاندانوں کی مالی امداد جیسے اہم سماجی اقدامات بھی کیے ہیں۔

انہوں نے کہا کہ سماج کو بہتر بنانا ان کی زندگی کا مقصد ہے اور وہ سماجی خدمت کے مشن پر تاحیات عمل پیرا رہیں گے۔ واضح رہے کہ اس فہرست میں عظیم پریم جی، اے آر رحمان، عامر خان، شاہ رخ خان، اسدالدین اویسی، غلام نبی آزاد، سابق نائب صدر حامد انصاری، محبوبہ مفتی، عمر عبداللہ اور سلمان خورشید سمیت دیگر معروف شخصیات کے نام بھی شامل ہیں۔