چنڈی گڑھ میونسپل کارپوریشن کے بینک کھاتے میں 116 کروڑ کی بے ضابطگی، 2 افراد کے خلاف مقدمہ درج

چنڈی گڑھ میونسپل کارپوریشن کے آئی ڈی ایف سی فرسٹ بینک میں 116 کروڑ روپے کی بے ضابطگی کا تازہ معاملہ سامنے آیا ہے۔ اس سلسلے میں چنڈی گڑھ پولیس نے بینک کے سابق برانچ منیجر رِبھو رشی اور چنڈی گڑھ میونسپل کارپوریشن کے کنٹریکٹ اکاؤنٹنٹ انوبھو مشرا کے خلاف مقدمہ درج کر لیا ہے۔ واضح رہے کہ چنڈی گڑھ کے سیکٹر 32 میں واقع آئی ڈی ایف سی فرسٹ بینک کی شاخ میں بھی چند روز قبل ہریانہ حکومت کے 556 کروڑ روپے کی بے ضابطگی کا معاملہ سامنے آیا تھا۔

واضح رہے کہ بینک کے جس سابق منیجر کے خلاف چنڈی گڑھ پولیس نے تازہ مقدمہ درج کیا ہے، اسے ہریانہ پولیس نے پہلے ہی سرکاری رقم میں 556 کروڑ روپے کی بے ضابطگی کے معاملے میں گرفتار کر رکھا ہے۔ ملزم نے ہریانہ حکومت کے فنڈز میں غبن کیا تھا، تاہم حکومت نے 24 گھنٹے کے اندر سود سمیت تمام رقم واپس حاصل کر لی تھی۔ اس معاملے میں ہریانہ کے وزیر اعلیٰ نائب سنگھ سینی نے خود اسمبلی میں تفصیلات فراہم کیں کہ کس طرح حکومت کا پیسہ واپس آیا۔

چنڈی گڑھ پولیس کے مطابق 116 کروڑ روپے کی بے ضابطگی کا معاملہ اس وقت سامنے آیا جب چنڈی گڑھ میونسپل کارپوریشن نے ’چنڈی گڑھ اسمارٹ سٹی پروجیکٹ‘ کے تحت ’چنڈی گڑھ اسمارٹ سٹی لمیٹڈ‘ کمپنی کی تمام رقم جو اس بینک میں موجود تھی، انہیں میونسپل کارپوریشن کے پنجاب نیشنل بینک کے اکاؤنٹ میں ٹرانسفر کرنے کی درخواست دی تھی۔

قابل ذکر ہے کہ چنڈی گڑھ میونسپل کاروپوریشن نے پنجاب نیشنل بینک میں رقم ٹرانسفر کرنے کے متعلق یہ قدم ہریانہ حکومت کی رقم میں بے ضابطگی سامنے آنے کے بعد اٹھایا تھا۔ میونسپل کارپوریشن کے ذریعہ چنڈی گڑھ اسمارٹ سٹی لمیٹڈ کی رقم منتقل کرنے کے لیے درخواست لکھنے کے بعد یہ بات سامنے آئی کہ جمع شدہ رقم اور جو پیسہ اس وقت بینک میں موجود ہے ان میں 116 کروڑ روپے کی بے ضابطگی ہے۔ فی الحال پولیس پورے معاملے کی گہرائی سے تحقیقات میں مصروف ہے۔