’مسائل کی نشاندہی کر اس کا حل نکالیں‘، تیجسوی یادو کی بہار حکومت کو نصیحت

راشٹریہ جنتا دل (آر جے ڈی) کے قومی ایگزیکٹو صدر تیجسوی یادو نے اتوار (5 اپریل) کو ایک بار پھر این ڈی اے حکومت کو ہدف تنقید بنایا ہے۔ انہوں نے جرائم، غربت، ہجرت اور بدعنوانی جیسے مسائل کا حوالہ دیتے ہوئے حکومت کو نصیحت دی ہے۔ ان کا کہنا ہے کہ ’’جب تک آپ مسائل کی نشاندہی کر ان کا حل نہیں نکالیں گے تب تک اپنی ناکامی کو چھپانے کے لیے ہر بار ایسے ہی انتخابات میں الیکشن کمیشن جیسے اداروں، بدعنوان افسران کے گٹھ جوڑ اور سرکاری مشینری کا غلط استعمال کرنا پڑے گا۔‘‘

بہار اسمبلی میں حزب اختلاف کے قائد تیجسوی یادو نے اتوار کو سوشل میڈیا پلیٹ فارم ’ایکس‘ پر لکھا کہ ’’ملک میں سب سے زیادہ جرائم، غربت، ہجرت، بدعنوانی اور سب سے زیادہ بے روزگاری بہار میں ہے۔ پُرتشدد جرائم اور اغوا میں بہار اول ہے۔ دوسری جانب ملک میں سب سے کم شرح خواندگی، فی کس آمدنی، کسانوں کی آمدنی اور فی کس سرمایہ کاری بہار میں ہے۔‘‘

تیجسوی یادو نے مزید لکھا کہ ’’یہی نہیں، ملک میں سب سے زیادہ ڈاکٹروں کے عہدے بہار میں خالی ہیں۔ تقریباً 58 فیصد عہدے خالی ہیں اور ملک میں سب سے زیادہ جھونپڑیوں میں رہنے والے لوگ بہار کے ہیں۔ بہار کی 14 فیصد آبادی جھونپڑیوں میں رہتی ہے۔‘‘ تیجسوی یادو نے آگے لکھا کہ ’’سنجیدگی سے اس پر غور و فکر کرو اور بتاؤ کہ 21 سالوں کے این ڈی اے دور حکومت کے بعد بھی بہار ترقی کے ان تمام اشاریوں میں قومی اوسط سے اتنا پیچھے کیوں ہے؟‘‘

آر جے ڈی لیڈر کے مطابق 21 سالہ این ڈی اے حکومت اور 12 سالہ ’ڈبل انجن‘ حکومت کے باعث گزشتہ 2 دہائیوں سے تعلیم، روزگار، آمدنی، صنعتی ترقی، پیداوار اور سرمایہ کاری کے ساتھ ساتھ صحت کی سہولیات اور غذائیت سے لے کر اکثر سماجی، انسانی اور اقتصادی اشاریوں میں بہار سب سے نچلے پائیدان پر ہے۔ واضح رہے کہ تیسجوی یادو اتوار کو جھارکھنڈ کے دورہ پر ہیں۔ جھارکھنڈ جانے قبل انہوں نے بہار میں شراب بندی کے قانون کو لے کر بھی سوال اٹھائے۔ انہوں نے کہا کہ شراب بندی کی حالت سب کے سامنے ہے، حکومت کے لوگ ہی قوانین کی دھجیاں اڑا رہے ہیں۔