ہریانہ میں کہرے کے سبب اندوہناک حادثہ، گاڑیوں کی ٹکر میں 4 افراد جان بحق

ہریانہ کے حصار ضلع میں شدید کہرے کی وجہ سے ایک بڑا حادثہ پیش آیا ہے۔ اُکلانا-سُرے والا چوک پر آج (ہفتہ) صبح دھند کی وجہ سے ہوئے شدید سڑک حادثے میں 4 لوگوں کی موت ہو گئی۔ ذرائع کے مطابق ایک کار دھند کی وجہ سے سُرے والا چوک واقع دیوار سے جا ٹکرائی اور اُلٹ گئی، پھر پیچھے سے آ رہی کار کی بھی اس سے ٹکر ہو گئی، ان دونوں گاڑیوں کے پیچھے سے آ رہے ٹرک کے ڈرائیور نے یہ دیکھتے ہوئے بریک لگایا تو ٹرک بھی اُلٹ گیا اور اس کے نیچے کئی لوگ دب گئے۔

اس حادثے میں چاروں افراد کی موت موقع پر ہی ہو گئی۔ مہلوکین کی شناخت ابھی تک نہیں ہو پائی ہے۔ وہیں ٹرک کے نیچے کئی اور لوگوں کے دبے ہونے کا اندیشہ بھی ظاہر کیا جا رہا ہے۔ حادثے کے بعد ہائی وے پر کثیر تعداد میں لوگوں کی بھیڑ جمع ہو گئی اور زخمیوں کی مدد میں ہاتھ بٹانا شروع کر دیا۔ فی الحال پولیس موقع پر پہنچ گئی ہے اور راحت و بچاؤ کام شروع کر دی ہے۔ اس سلسلے میں آگے کی جانچ جاری ہے۔

پولیس کا کہنا ہے کہ یہ حادثہ اُکلانا کے سُرے والا چوک پر ہوا ہے۔ جو کار ڈیوائڈر سے ٹکرا کر اُلٹ گئی تھی وہ نروانا کی طرف سے آ رہی تھی۔ اس کے بعد پیچھے سے آ رہی ایک کار اس کار سے ٹکرا گئی۔ اس حادثے میں دونوں کار بُری طرح تباہ ہو چکے ہیں۔ ابھی تک مرنے والوں کی شناخت نہیں ہو سکی ہے۔