گجرات: 40 دن بھی نہیں ہوئے اور تاپی ندی پر تیار پل میں آ گیا شگاف، 17 مئی کو وزیر اعلیٰ نے کیا تھا افتتاح

گجرت کے وزیر اعلیٰ بھوپیندر پٹیل کے ذریعہ افتتاح کے بمشکل 40 دن بعد سورت میں تاپی ندی پر نوتعمیر وید-وریاؤ پل میں شگاف پیدا ہو گیا ہے۔ 17 مئی کو پل کا افتتاح کیا گیا تھا۔ اسے 118 کروڑ روپے کی لاگت سے بنایا گیا تھا۔ یہ سورت میں وریاؤ اور وید گاؤں کو جوڑتا ہے اور علاقے کے 8 لاکھ سے زیادہ لوگوں کے لیے آسانیاں میسر کرتا ہے۔ یہ پل 1.5 کلومیٹر تک پھیلا ہوا ہے اور اس میں چار لین ہیں۔

وریاؤ کی طرف جانے والی سڑک پر شگاف پائے جانے کے بعد عآپ کونسلر اور سورت میونسپل کارپوریشن میں اپوزیشن لیڈر دھرمیش بھنڈیری نے دیگر افسران کے ساتھ وہاں پہنچ کر جائزہ لیا۔ سورت میونسپل کارپوریشن افسران کا ماننا ہے کہ علاقہ میں پانی جمع ہونے سے یہ نقصان ہوا ہوگا۔

ایس ایم سی کے برج سیل محکمہ نے پل کے متاثر حصے پر فوری مرمت کا کام شروع کر دیا ہے۔ ملازمین اسے ٹھیک کرنے اور گاڑیوں کی آمد و رفت بحال کرنے کے لیے کام کر رہے ہیں۔ اس درمیان بھنڈیری نے ہائی کورٹ کے سبکدوش جج سے اس معاملے کی جانچ کرانے کا مطالبہ کیا ہے۔ انھوں نے پہلی بارش کے دوران شگاف نظر آنے کا حوالہ دیتے ہوئے پل تعمیر کے عمل میں بدعنوانی کا الزام لگایا ہے۔ بھنڈیری کا دعویٰ ہے کہ شہر میں بی جے پی لیڈران کے قریبی ٹھیکیداروں اور بلڈروں کو ٹھیکے دیے گئے اور اس کا نتیجہ سب کے سامنے ہے۔