دہلی میں رام لیلا کے انعقاد کی اجازت لیکن سخت شرطوں کےساتھ

دہلی ڈیزاسٹر منیجمنٹ اتھارٹی (ڈی ڈی ایم اے) نے اتوار کو سخت شرائط کے ساتھ رام لیلا کے انعقاد اور درگا پوجا منانے کے لئے پنڈال لگانے کی اجاز ت دے دی ہے۔ دہلی حکومت کی طرف سے کل دیر شام اس سلسلہ میں ہدایت جاری کی گئی۔

ڈی ڈی ایم اے نے تہواروں کے لئے معیاری آپریٹنگ طریقہ کار (ایس او پی) جاری کرکے بتایا کہ درگا پوجا اور رام لیلا کی اجازت دی گئی ہے لیکن میلہ، جھولااور کھانے پینے کے اسٹال نہیں لگیں گے۔

ایس او پی کے مطابق ضلع مجسٹریٹ اور ڈپٹی کمشنر مشترکہ طورپر معائنہ کے بعد پوجا، پنڈال اور رام لیلا کے لئے اجازت دیں گے۔ معیارات کے تحت منتظمین کو پورے پروگرام کی ویڈیو گرافی کرنی ہوگی۔ ماسک کے بغیر لوگوں کو آنے کی اجازت نہیں ہوگی اور سماجی دوری پر عمل کرنا لازمی ہوگا۔ اس کے علاوہ ناظرین اور عقیدت مندوں کے آنے جانے کے لئے الگ الگ دروازوں کا انتظام کرنا ہوگا۔

انعقاد کے دوران لوگوں کی تعداد کے لئے مرکزی وزارت داخلہ کی 30 ستمبر کو رہنماہدایات پر عمل کرنا ہوگا۔ وزارت داخلہ کی ہدایت میں بند جگہ پر مجموعی گنجائش کی پچاس فیصد تک موجودگی اور کھلے مقامات پر سوشل ڈسٹینسنگ پر عمل کرنا لازمی ہوگا۔

پوجا پنڈال یا تہوار کے لئے ہوئے انعقاد میں کسی شخص کو کھڑے ہونے کی اجازت نہیں ہوگی اور نہ ہی کوئی زمین پر بیٹھے گا۔ سوشل ڈسٹنسنگ کے اصولوں کے ساتھ صرف کرسی پر بیٹھنے کی اجازت ہوگی۔ اس کے لئے بھی کورونا سے بچاو کے تمام اصولوں پر عمل کرنا لازمی ہوگا۔ منتظمین کو غیرمستقل ٹوائلیٹ، الیکٹرسٹی، پانی، سینی ٹائزر اور تھرمل اسکریننگ کا انتظام بھی کرنا ہوگا۔

دہلی حکومت کے باضابطہ آرڈر میں تہوار کے دوران 31اکتوبر تک میلہ، کسی انعقاد کے اندر یا باہر فوڈ اسٹال، ریلی، مظاہرہ یاجلوس کی اجازت نہیں ہوگی۔