گوپال گنج: گیس سلنڈر میں آگ لگنے سے 17 افراد جھلسے، 2 لوگوں کی موت، 6 کی حالت سنگین

بہار کے گوپال گنج میں گیس سلنڈر میں آگ لگنے کا خوفناک واقعہ سامنے آیا ہے۔ وزیر تعلیم متھلیش تیواری کے اسمبلی حلقہ بیکنٹھ پور میں یہ حادثہ پیش آیا۔ بتایا جا رہا ہے کہ گزشتہ شام تقریباً 6 بجے سلنڈر کا ریگولیٹر لگانے کے دوران گیس رساؤ کے سبب آگ لگ گئی، جس کی زد میں آ کر 17 افراد بری طرح جھلس گئے۔ سبھی زخمیوں کو علاج کے لیے صدر اسپتال میں داخل کرایا گیا ہے۔

زخمیوں میں 6 کی حالت سنگین بتائی جا رہی ہے اور انھیں بہتر علاج کے لیے دوسرے اسپتال ریفر کیا گیا ہے۔ اس حادثہ میں اب تک 2 لوگوں کی موت بھی ہو چکی ہے۔ مہلوکین میں ایک بچہ بھی شامل ہے، جس کی پی ایم سی ایچ لے جانے کے دوران موت ہو گئی۔ اس کے کچھ ہی دیر بعد مزید ایک زخمی نے دم توڑ دیا۔ واقعہ بیکنٹھ پور تھانہ حلقہ کے صفی آباد گاؤں کا ہے۔ حادثہ کی خبر ملتے ہی گوپال گنج کے ضلع مجسٹریٹ سمیر سوربھ صدر اسپتال پہنچے اور حالات کا جائزہ لیا۔

ضلع مجسٹریٹ نے زخمیوں کے علاج کا انتظام دیکھا اور ڈاکٹروں کو علاج میں تیزی لانے کے ساتھ بہتر طبی سہولیات فراہم کرانے کی ہدایت دی۔ ضلع مجسٹریٹ سمیر سوربھ نے فوری علاج کے لیے ضروری وسائل کا انتظام بھی کرایا۔ اس کے بعد خود اسپتال پہنچ کر پورے معاملے کی جانکاری لی اور زخمیوں کو بہتر علاج دستیاب کرانے سے متعلق ضروری ہدایات دیں۔

اس حادثہ کی جانکاری ملنے کے بعد بیکنٹھ پور کے رکن اسمبلی اور بہار کے وزیر تعلیم متھلیش تیواری دیر شب صدر اسپتال پہنچے۔ انھوں نے زخمیوں سے ملاقات کر ان کا حال جانا اور جاری علاج کی جانکاری لی۔ وزیر تعلیم نے کہا کہ سبھی متاثرین کو بہتر علاج کے لیے اگلے دن پی ایم سی ایچ کے ’برن وارڈ‘ میں منتقل کیا جائے گا۔ متھلیش تیواری نے اس حادثہ کو انتہائی افسوسناک بتایا اور کہا کہ صبح جائے حادثہ پر جا کر پورے معاملے کی جانکاری لیں گے۔ ساتھ ہی متاثرہ کنبوں کو مناسب معاوضہ دلانے کی بات بھی کہی۔