گوا: ایس آئی آر کی حتمی ووٹر لسٹ 14 فروری کو نہیں ہوگی جاری! الیکشن کمیشن نے ریاستی چیف الیکشن افسر کو لکھا خط

گوا میں ووٹر لسٹ کی خصوصی گہری نظر ثانی (ایس آئی آر) کے بعد حتمی ووٹر لسٹ 14 فروری کو جاری کی جانی تھی۔ اس کے متعلق گوا کے چیف الیکشن آفیسر (سی ای او) نے تیاری شروع کر دی تھی، لیکن اب فائنل ووٹر لسٹ 14 فروری کو جاری نہیں ہوگی۔ اسی سلسلے میں الیکشن کمیشن آف انڈیا نے گوا کے کے چیف الیکشن آفیسر کو خط لکھا ہے۔ رپورٹس کے مطابق اب گوا کی فائنل ووٹر لسٹ 21 فروری کو جاری کی جائے گی۔

الیکشن کمیشن آف انڈیا نے بدھ کو اعلان کیا کہ گوا میں جاری ووٹر لسٹ کی خصوصی گہری نظر ثانی (ایس آئی آر) کے تحت حتمی ووٹر لسٹ 14 فروری کو جاری نہیں کی جائے گی۔ اب ووٹر لسٹ 21 فروری کو جاری کی جائے گی۔ الیکشن کمیشن آف انڈیا نے گوا کے چیف الیکشن آفیسر کو لکھے خط میں کہا کہ ایس آئی آر کے تحت حتمی ووٹر لسٹ 21 فروری کو جاری کی جائے گی۔

ای سی آئی نے گوا کے سی ای او کو اس تعلق سے سیاسی پارٹیوں اور دیگر لوگوں مطلع کرنے کی ہدایت دی ہے۔ دراصل گزشتہ سال 16 دسمبر کو مسودہ ووٹر لسٹ جاری کی گئی تھی، جبکہ حتمی ووٹر لسٹ ہفتہ (14 فروری) کو جاری کی جانی تھی۔ مسودہ ووٹر لسٹ میں شامل 11.85 لاکھ ووٹرس میں سے 10.84 لاکھ کو مسودہ فہرست میں شامل کیا گیا، جبکہ دیگر 1.01 لاکھ کو غیر حاضر، منتقل، متوفی یا دوہرے اندراج کے زمرے میں رکھا گیا ہے۔

واضح رہے کہ گوا میں ووٹر لسٹ کی خصوصی گہری نظر ثانی (ایس آئی آر) کا عمل 4 نومبر سے شروع ہوا تھا۔ 31 دسمبر تک اسے مکمل کیا جانا تھا اور یکم جنوری کو حتمی ووٹر لسٹ جاری کرنی تھی۔ اس درمیان ای سی آئی نے ایس آئی آر عمل کو 19 جنوری تک بڑھا دیا۔ اس کے بعد طے کیا گیا کہ 14 فروری کو فائنل ووٹر لسٹ جاری کر دی جائے گی۔ لیکن ایک بار پھر ای سی آئی نے نئی تاریخ کا اعلان کر دیا۔ جبکہ گوا میں ایس آئی آر کی شروعات میں الیکشن کمیشن نے دعویٰ کیا تھا کہ وقت مقررہ پر اس عمل کو مکمل کر لیا جائے گا۔