سابق چیف الیکشن کمشنر راجیو کمار ایچ ڈی ایف سی بینک کے نئے چیئرمین مقرر

ایچ ڈی ایف سی بینک نے ڈائریکٹرز کے بورڈ کے چیئرمین کی تقرری کے معاملے میں بڑا قدم اٹھایا ہے۔ بینک کے بورڈ نے سابق چیف الیکشن کمشنر راجیو کمار کو نیا چیئرمین مقرر کرنے کا اعلان کیا ہے۔ اب ریزرو بینک آف انڈیا (آر بی آئی) کی منظوری کا انتظار ہے۔ ایچ ڈی ایف سی بینک نے ریگولیٹری فائلنگ میں بتایا کہ بورڈ آف ڈائریکٹرز نے راجیو کمار کو 4 سال کے لیے بینک کا آزاد ڈائریکٹر مقرر کرنے کی منظوری دے دی ہے۔ یہ تقرری 30 جون 2026 سے نافذ العمل ہوگی۔ بینک نے کہا کہ ان کی تقرری آر بی آئی کی منظوری ملنے پر منحصر ہے۔ مرکزی بینک سے منظوری ملنے کے بعد ان کو 3 سال کے لیے بینک کا پارٹ ٹائم چیئرمین مقرر کیا جائے گا۔ یہ تقرری آر بی آئی کی منظوری کی تاریخ سے نافذ العمل ہوگی۔ واضح رہے کہ راجیو کمار ہندوستان کے 25 ویں چیف الیکشن کمشنر رہ چکے ہیں۔

سابق چیف الیکشن کمشنر راجیو کمار، اتنو چکرورتی کی جگہ لیں گے، جنہوں نے مارچ میں اخلاقی خدشات کا حوالہ دیتے ہوئے اچانک استعفیٰ دے دیا تھا۔ بینک نے کہا ہے کہ محکمہ مالیاتی خدمات (2017-2020) کے سکریٹری کے طور پر راجیو کمار نے ایک ایسے وقت میں عہدہ سنبھالا تھا جب سرکاری بینک کئی چیلنجز سے دوچار تھے۔ ان میں بڑی تعداد میں غیر شناخت شدہ غیر فعال اثاثے (این پی اے)، سرمائے کی کمی، اور ایکویٹی و قرض کا غلط استعمال جیسے مسائل شامل تھے۔ اس میں کہا گیا ہے کہ مضبوط پالیسی اور اس پر عمل درآمد کے ذریعے کمار نے بینکوں کے کھاتوں کو صاف ستھرا اور مضبوط بنانے میں اہم کردار ادا کیا۔

ایچ ڈی ایف سی بینک کے مطابق راجیو کمار نے این پی اے کی صاف صاف شناخت اور ان کے لیے ضروری پروویژن کو لازمی قرار دیا، جبکہ  دیوالیہ پن اور قرض کی وصولی سے متعلق قانون (آئی بی سی) کے تحت قرض لینے والوں کی جواب دہی بھی طے کی۔ بینک نے ایک ایکسچینج فائلنگ میں بتایا کہ 1984 بیچ کے سابق آئی اے ایس افسر اور ہندوستان کے سابق فنانس سکریٹری (فروری 2020) 66 سالہ راجیو کمار کو 4 سال کے لیے بینک کا ایڈیشنل ڈائریکٹر (آزاد) بھی مقرر کیا گیا ہے، جس کا اطلاق 30 جون 2026 سے ہوگا۔

اس دوران ایچ ڈی ایف سی بینک کے مینجنگ ڈائریکٹر (ایم ڈی) اور سی ای او کے طور پر ششدھر جگدیشن کی موجودہ مدت ملازمت 26 اکتوبر 2026 کو ختم ہونے والی ہے۔ انہوں نے 27 اکتوبر 2020 سے یہ ذمہ داری سنبھالی تھی۔ ان کی موجودہ 3 سالہ مدت ملازمت (27 اکتوبر 2023 سے 26 اکتوبر 2026 تک) کی منظوری آر بی آئی نے 2023 میں دی تھی۔ قوی امکان ہے کہ بورڈ آر بی آئی کی منظوری ملنے پر جگدیشن کو ایم ڈی اور سی ای او کے طور پر تیسری مدت کے لیے سفارش کرے گا۔ دوبارہ تقرری کا عمل، جو بیرونی قانونی جائزے کی وجہ سے رکا ہوا تھا، اب آگے بڑھ سکتا ہے کیونکہ لا فرموں نے بینک کو کلین چٹ دیتے ہوئے رپورٹ سونپ دی ہے۔