فریضۂ حج کی ادائیگی کے بعد حجاج کرام کی وطن واپسی کا آغاز، پہلی پرواز سے 371 عازمین دہلی پہنچے

نئی دہلی: مقدس فریضۂ حج کی ادائیگی کے بعد ہندوستانی حجاج کرام کی وطن واپسی کا سلسلہ شروع ہو گیا ہے۔ سعودی عرب کے مقدس مقامات پر حج کی سعادت حاصل کرنے والے عازمین حج کی پہلی واپسی پرواز 2 جون کو دہلی پہنچی، جس کے ساتھ ہی شمالی ہند کے سب سے بڑے حج امبارکیشن پوائنٹ دہلی میں واپسی کے مرحلے کا باقاعدہ آغاز ہو گیا۔

سعودی ایئرلائن کی پرواز نمبر ایس وی-5818 کے ذریعے 371 حجاج کرام دہلی پہنچے۔ اندرا گاندھی بین الاقوامی ہوائی اڈے پر مرکزی وزیر برائے اقلیتی امور جناب کرن رجیجو نے خود موجود رہ کر حجاج کے پہلے قافلے کا استقبال کیا اور انہیں پھولوں کے ہار پہنائے۔ اس موقع پر دہلی اسٹیٹ حج کمیٹی کی چیئرپرسن محترمہ کوثر جہاں، ایگزیکٹو آفیسر اشفاق احمد عارفی، ڈپٹی ایگزیکٹو آفیسر محسن علی اور حج کمیٹی کے دیگر عہدیداران بھی موجود تھے۔

کوثر جہاں نے اس موقع پر کہا کہ حجاج کے پہلے قافلے کے استقبال کے لیے مرکزی وزیر کا خود ہوائی اڈے پر پہنچنا وزارتِ اقلیتی امور اور وزیر اعظم نریندر مودی کی قیادت میں مرکزی حکومت کی حج کے تئیں خصوصی دلچسپی کا مظہر ہے۔ انہوں نے کہا کہ اسی توجہ کے نتیجے میں اس سال ہندوستانی حجاج کو گزشتہ برسوں کے مقابلے میں بہتر سہولیات فراہم کی گئیں، جن کا فائدہ مکہ مکرمہ، مدینہ منورہ، منیٰ اور عرفات سمیت مختلف مقامات پر حاصل ہوا۔

انہوں نے بتایا کہ ماضی میں حجاج کو مکہ مکرمہ اور مدینہ منورہ کے درمیان بسوں کے ذریعے سفر کرنا پڑتا تھا، جس میں کئی گھنٹے لگتے تھے، تاہم اس سال پہلی مرتبہ بڑی تعداد میں حجاج کو بلیٹ ٹرین کے ذریعے منتقل کیا گیا، جس سے سفر زیادہ آرام دہ اور تیز رفتار بن گیا۔ اسی طرح منیٰ میں قائم دنیا کی سب سے بڑی خیمہ بستی میں پہلی مرتبہ صوفہ بیڈ اور دیگر ضروری سہولیات بھی فراہم کی گئیں۔

دہلی اسٹیٹ حج کمیٹی کے ایگزیکٹو آفیسر کے مطابق پہلی پرواز سے واپس آنے والے 371 حجاج میں 191 دہلی، 160 اتر پردیش، 12 بہار، 2 ہریانہ، 4 اتراکھنڈ اور 2 جموں و کشمیر کے رہائشی شامل تھے۔ انہوں نے بتایا کہ اس سال سرکاری کوٹے کے تحت پورے ملک سے ایک لاکھ بہتر ہزار پچیس حجاج نے حج ادا کیا، جن میں دہلی ریاست کے 3,212 عازمین شامل تھے۔

انہوں نے مزید بتایا کہ دہلی امبارکیشن پوائنٹ سے مجموعی طور پر 21,032 حجاج نے حج کے لیے روانگی اختیار کی تھی۔ ان میں مختلف ریاستوں اور مرکز کے زیر انتظام علاقوں کے عازمین شامل تھے۔ مجموعی تعداد میں 9,684 خواتین اور 11,348 مرد شامل تھے، جبکہ دو ہزار افراد قلیل مدتی حج پروگرام کے تحت روانہ ہوئے تھے۔ بغیر محرم حج پر جانے والی خواتین کی تعداد 43 رہی۔

حج کمیٹی کے مطابق دہلی سے مجموعی طور پر 54 پروازوں کے ذریعے عازمین کو سعودی عرب بھیجا گیا تھا اور ان کی واپسی بھی 54 پروازوں کے ذریعے مکمل ہوگی۔ حجاج کرام کی واپسی کا یہ سلسلہ جون کے اختتام تک جاری رہے گا اور دہلی پہنچنے والی آخری حج پرواز 30 جون کو متوقع ہے۔