ہریانہ اور پنجاب میں دھان کی سرکاری خریداری یکم اکتوبر کے بجائے 11 اکتوبر سے شروع کرنے کے مرکزی حکومت کے فیصلہ کے خلاف متحدہ کسان مورچہ کے ’ہلا بول‘ پروگرام کے تحت کل دونوں ریاستوں کے کسانوں نے برسر اقتدارپارٹی کے ارکان پارلیمنٹ ، وزراء اور ایم ایل اے کے گھروں کا گھیراؤ اور اناج منڈیوں میں احتجاج کیا۔
Published: undefined
کسان دونوں ریاستوں میں کئی مقامات پر قائدین کی رہائش گاہوں کے باہر غیر معینہ دھرنے پر بیٹھے ۔ ان کا کہنا ہے کہ دھان کی خریداری شروع ہونے تک ان کا دھرنا جاری رہے گا۔
Published: undefined
کسانوں کی ایک بڑی تعداد نے ہریانہ کے وزیر اعلیٰ منوہر لال کھٹر کی رہائش گاہ سے کچھ دور صبح میں کرنال پہنچ کر احتجاج کیا۔ کسانوں نے ہاتھوں میں سیاہ جھنڈے اور بینر اٹھا رکھے تھے۔ کچھ کسان ٹریکٹر ٹرالیوں کے ساتھ وہاں پہنچے۔ ان میں سے کچھ دھان سے لدے ہوئے تھے۔ وزیراعلیٰ کی رہائش گاہ جانے والی سڑک پر قائم ناکہ بندی پر کسانوں کی پولیس سے جھڑپ بھی ہوئی، جس پر کسانوں کو منتشر کرنے کے لیے پانی کی بوچھاریں استعمال کی گئیں۔ کسان اب وہاں دھرنے پر بیٹھ گئے ہیں۔
Published: undefined
دھان کی خریداری جلد شروع کرنے کا مطالبہ کرنے والے متحدہ کسان مورچہ کے ’ہلا بول‘ پروگرام کے پیش نظر پولیس نے ریاست کے تمام ارکان پارلیمنٹ ، وزراء ، ایم ایل اے اور حکمران جماعت کے رہنماؤں کی رہائش گاہوں کے باہر سیکورٹی کے سخت انتظامات کیے تھے۔
Published: undefined
ہریانہ میں کسانوں نے یمنا نگر ، انبالہ ، کوروکشیتر ، شاہ آباد ، کیتھل ، روہتک ، فتح آباد میں ارکان پارلیمنٹ ، وزراء اور ایم ایل اے کی رہائش گاہوں کا گھیراؤ کرنے کیلئے ہلا بول دیا اور مظاہرہ و نعرے لگائے۔ کسان بھی اناج منڈیوں میں جمع ہوئے اور وہاں مظاہرہ کیا۔ ان مقامات پرانہوں نے پولیس کی طرف سے قائم رکاوٹوں اور بلاکس کو توڑ دیا اور آگے بڑھ گئے۔ پنجاب کے کابینہ وزیر اوپی سینی کی رہائش گاہ کے باہر کسانوں نے احتجاج و مظاہرہ کیا اور وہاں دھرنے پر بیٹھ گئے۔
Published: undefined
دریں اثنا ذرائع کے مطابق ہریانہ حکومت دھان کی خریداری شروع کرنے میں سنجیدہ ہے اور وزیر اعلیٰ اور زراعت اور کسانوں کی بہبود کے وزیر جئے پرکاش دلال دہلی جائیں گے اور ممکنہ طور پر مرکزی وزیر خوراک و سپلائی اشونی چوبے سے ملاقات کریں گے تاکہ دھان کی خریداری کے معاملے پر بات چیت کی جاسکے۔
Published: undefined
دوسری طرف ہریانہ کے وزیر داخلہ انل وج نے ایک ٹویٹ میں کہا’’کسانوں کی تحریک دن بہ دن پرتشدد ہوتی جا رہی ہے اور مہاتما گاندھی کے ملک میں پرتشدد تحریک کی اجازت نہیں دی جا سکتی‘‘۔
Published: undefined
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
Published: undefined
تصویر: محمد تسلیم