اتراکھنڈ میں کیدارناتھ یاترا تین روزکے لیے عارضی طور پر ملتوی

محکمہ موسمیات کے مرکز، دہرادون کی طرف سے شدید بارش کی پیشن گوئی کے پیش نظر، اتراکھنڈ انتظامیہ نے کیدارناتھ یاترا کو اگلے تین دنوں یعنی 12، 13 اور 14 اگست کے لیے عارضی طور پر ملتوی کر دیا ہے۔محکمہ موسمیات نے پیر کو یہ اطلاع دی۔ محکمہ نے اگلے تین دنوں میں ریاست بھر میں موسلادھار بارش کی پیشن گوئی کی ہے۔ اس وارننگ کے پیش نظر ضلعی انتظامیہ نے سخت حفاظتی انتظامات کیے ہیں۔

ضلع مجسٹریٹ پرتیک جین نے کہا کہ ریاستی ڈیزاسٹر مینجمنٹ ڈیپارٹمنٹ سے موصولہ رہنما خطوط کے مطابق تمام محکموں کو چوکس رہنے اور احتیاط برتنے کی ہدایت دی گئی ہے۔ انتظامیہ نے کیدارناتھ آنے والے عقیدت مندوں سے درخواست کی ہے کہ وہ محکمہ موسمیات کی وارننگ کے پیش نظر فی الحال سفر کرنے سے گریز کریں۔ انتظامیہ نے دریا کے کنارے رہنے والے لوگوں سے محفوظ مقامات پر جانے کی اپیل کی ہے۔

یاتریوں کی حفاظت کو مدنظر رکھتے ہوئے کیدارناتھ دھام کی یاترا کو اگلے تین دنوں کے لیے عارضی طور پر ملتوی کر دیا گیا ہے۔ تمام قومی شاہراہوں کے خطرے والے علاقوں میں 24 گھنٹے جے سی بی اور پوک لینڈ مشینیں تعینات کی گئی ہیں، تاکہ سڑک بلاک ہونے کی صورت میں اسے کھولنے کے لیے فوری کارروائی کی جا سکے۔ اس کے علاوہ پولیس، محکمہ تعمیرات عامہ اور ڈیزاسٹر مینجمنٹ ٹیموں کو مسلسل چوکس رہنے کی ہدایت دی گئی ہے۔

ضلع مجسٹریٹ نے کہا کہ ندی کے پانی کی سطح پر مسلسل نظر رکھی جا رہی ہے اور مختلف ذرائع سے لوگوں کو موسم کی معلومات اور ایلرٹ جاری کیا جا رہا ہے۔ انتظامیہ کی جانب سے یہ تمام اقدامات عقیدت مندوں اور شہریوں کی حفاظت کو مدنظر رکھتے ہوئے اٹھائے گئے ہیں۔