دہلی سے حج پروازوں کا سلسلہ مکمل، آخری پرواز سے 396 عازمین حج مکہ مکرمہ روانہ

نئی دہلی: دہلی اسٹیٹ حج کمیٹی کے زیر انتظام اندرا گاندھی بین الاقوامی ہوائی اڈہ سے مقدس سفر حج کے لیے روانگی کا مرحلہ مکمل ہو گیا۔ 20 مئی کی شام آخری حج پرواز کے ذریعے 396 عازمین حج کو مکہ مکرمہ روانہ کیا گیا، جس کے ساتھ ہی اس سال دہلی سے حج پروازوں کا سلسلہ اختتام کو پہنچ گیا۔

دہلی اسٹیٹ حج کمیٹی کے مطابق سعودی ایئرلائنز کی پرواز نمبر ایس وی-3155 کے ذریعے روانہ ہونے والی یہ 54ویں اور آخری حج پرواز تھی۔ اس کے ساتھ ہی دہلی اور دیگر ریاستوں سے تعلق رکھنے والے مجموعی طور پر 21032 عازمین حج کی روانگی کا عمل مکمل ہو گیا۔ ان میں 3213 عازمین دہلی سے جبکہ 17821 دیگر ریاستوں سے تعلق رکھتے ہیں۔

حجاج کرام کو رخصت کرنے کے لیے اندرا گاندھی بین الاقوامی ہوائی اڈہ پر دہلی اسٹیٹ حج کمیٹی کی چیئرپرسن کوثر جہاں، ایگزیکٹو آفیسر اشفاق احمد عارفی، نائب ایگزیکٹو آفیسر محسن علی اور حج کمیٹی و ہوائی اڈہ انتظامیہ کے اہلکار موجود رہے۔

اس موقع پر کوثر جہاں نے کہا کہ حج کی ادائیگی مکمل ہونے کے بعد 2 جون سے حجاج کرام کی وطن واپسی کا سلسلہ شروع ہوگا۔ انہوں نے بتایا کہ واپسی کے انتظامات اور استقبال کی تیاریوں کے سلسلے میں 21 مئی کو اندرا گاندھی بین الاقوامی ہوائی اڈہ پر مختلف متعلقہ اداروں کے ساتھ ایک اہم میٹنگ منعقد کی جائے گی، تاکہ حجاج کو سہولتوں کی فراہمی یقینی بنائی جا سکے۔

اس سال ہندوستان سے مجموعی طور پر 175025 عازمین حج مقدس سفر پر روانہ ہوئے ہیں۔ ان میں سرکاری انتظامات کے تحت جانے والے 122025 حجاج شامل ہیں۔ دہلی اسٹیٹ حج کمیٹی کے زیر انتظام اندرا گاندھی بین الاقوامی ہوائی اڈہ شمالی ہندوستان کے بڑے حج مراکز میں شمار ہوتا ہے، جہاں سے اس مرتبہ 54 خصوصی حج پروازیں روانہ ہوئیں۔

18 اپریل سے 4 مئی تک 31 پروازیں مدینہ منورہ کے لیے روانہ کی گئیں، جبکہ 6 مئی سے 20 مئی تک 23 پروازوں کے ذریعے عازمین حج کو مکہ مکرمہ پہنچایا گیا۔ اب حج آپریشن کے اگلے مرحلے میں حجاج کرام کی وطن واپسی کے انتظامات پر توجہ دی جا رہی ہے۔