دہلی کانگریس اقلیتی شعبہ نے ’ووٹ چور گدی چھوڑ مہا ریلی‘ کو کامیاب بنانے کے لیے کسی کمر

نئی دہلی: دہلی کے تاریخی رام لیلا میدان میں 14دسمبر 2025 کو ہونے جا رہی کانگریس کی ’ووٹ چور گدی چھوڑ مہا ریلی‘ کی تیاریاں پورے زور و شور سے چل رہی ہے۔ اسی ضمن میں دہلی کانگریس اقلیتی شعبہ کی اہم میٹنگ دہلی پردیش کانگریس کمیٹی کے دفتر راجیو بھون میں منعقد ہوئی، جس کی صدارت دہلی کانگریس اقلیتی شعبہ کے چیئرمین عبدالواحد قریشی نے کی۔ میٹنگ میں دہلی پردیش کانگریس کمیٹی کے صدر دیویندر یادو، انچارج الطاف حسین، میڈیا و کمیونیکیشن ڈیپارٹمنٹ کے چیئر مین انل بھردواج کے علاوہ اقلیتی شعبہ کے سبھی عہد دران و کارکنان بڑی تعداد میں شرکت کی۔

میٹنگ سے خطاب کرتے ہوئے دہلی کانگریس کے صدر دیویندر یادو نے اعلان کیا کہ 14 دسمبر کو رام لیلا میدان میں ہونے والی ’ووٹ چور گدی چھوڑ‘ مہا ریلی کی تمام تیاریاں مکمل کر لی گئی ہیں۔ انہوں نے کہا کہ اس بار ریلی میں دہلی کانگریس کارکنان کی شرکت تاریخی سطح پر ہوگی۔ انہوں نے کہا کہ کانگریس کارکنان کے ساتھ ساتھ دہلی کے ہر گھر میں اس پر بات کی جا رہی ہے۔ ریلی میں نہ صرف کارکن بلکہ دہلی کے شہری بھی بڑی تعداد میں شامل ہوں گے تاکہ وہ راہل گاندھی کو براہ راست سن سکیں۔ دیویندر یادو نے کہا کہ وہ خود اس ریلی میں بادلی اسمبلی حلقہ سے کانگریس کارکنان کے ساتھ شرکت کریں گے۔

میٹنگ میں ریلی کے تعلق سے بات کرتے ہوئے چیئرمین عبدالواحد قریشی نے کہا کہ 14 دسمبر کی مہا ریلی کوئی معمولی ریلی نہیں ہے یہ ریلی الیکشن میں ہو رہی دھاندلی اور ووٹ چوری کے خلاف ہے۔

انہوں نے کہا کہ ’’دہلی کانگریس کا ایک ایک سپاہی اس ریلی کی تیاریوں میں پوری جی جان سے لگا ہوا ہے اور اقلیتی شعبہ بھی پوری طرح ریلی کو کامیاب بنانے کے لیے کمر بستہ ہے۔ انہوں نے کہا کہ کوئی بھی کام تبھی اپنے مقصد کو پہنچتا ہے جس میں سب کا مشورہ شامل ہو۔‘‘

انہوں نے کہا کہ اقلیتی شعبہ کے جتنے بھی اراکین و عہد دران ہیں وہ اس بات کو یقینی بنانے پر زور دیں کہ 14 دسمبر کو اپنے اپنے علاقوں سے زیادہ سے زیادہ لوگوں کی شرکت ریلی میں کروائیں۔ تاہم اس کے لیے لوگوں کو ووٹ چوری جیسے سنگین معاملے کے بارے میں ضرور بتائیں کہ جو ووٹ تم اپنی ترقی و خوشحالی کے لیے دیتے ہو وہ اگر چوری ہو رہا ہے تو یہ ہم سب کے لیے غور و فکر اور اس کے خلاف آواز بلند کرنے کا وقت ہے۔ اس کے خلاف ہمیں آواز بلند کرنی چاہئے۔

چیئرمین عبد الواحد قریشی نے کہا کہ ہمارے لیڈر راہل گاندھی ’ووٹ چوری‘ کی لڑائی لڑ رہے ہیں اور وہ اس ملک اور لوگوں سے بے حد پیار کرتے ہیں۔ آج ووٹ چوری کا مدعا پورے ملک میں ہو رہا ہے جس کا انکشاف کئی بار ہمارے لیڈر راہل گاندھی کر چکے ہیں اور دلیلیں بھی پیش کر چکے ہیں لیکن اس کے باوجود موجودہ سرکا ر مسلسل جھوٹ بول رہی ہے ۔ کانگریس پارٹی کی تاریخ رہی ہے جب جب ملک میں عوام کے ساتھ دھوکہ یا ناانصافی ہوئی اس نے لوگوں کے حق کی لڑائی لڑی ہے اور آج ووٹ چوری کے خلاف کانگریس پارٹی راہل گاندھی کی قیادت میں 14دسمبر کو جو مہا ریلی کرنے جا رہی ہے اور ہمیں پوری امید ہے کہ یہ ریلی کامیابی سے ہمکنار ہوگی۔