عالمی منڈی میں خام تیل کے داموں میں گراوٹ، لیکن پٹرول اور ڈیزل کی قیمتوں میں کوئی راحت نہیں

نئی دہلی: بین الاقوامی بازار میں خام تیل کی قیمتوں میں گراوٹ کے باوجود گھریلو سرکاری تیل کی مارکیٹنگ کمپنیوں نے آج بھی پٹرول اور ڈیزل کی قیمتوں میں کوئی راحت نہیں دی، جس کی وجہ سے دارالحکومت دہلی میں پٹرول اور ڈیزل کی قیمتیں اٹھارہویں دن بھی مستحکم رہیں۔

مرکزی حکومت کی طرف سے دیوالی کے موقع پر پٹرول اور ڈیزل پر ایکسائز ڈیوٹی میں بالترتیب 5 اور 10 روپے فی لیٹر کی کمی سے ملک میں ان دونوں ایندھنوں کی قیمتوں میں کمی آئی۔ اس کے بعد اتر پردیش، کرناٹک سمیت ملک کی 22 ریاستوں اور مرکز کے زیر انتظام علاقوں نے ان دونوں مصنوعات پر ویلیو ایڈڈ ٹیکس (ویٹ) کو کم کر دیا جس سے متعلقہ ریاستوں میں ان دونوں پٹرولیم مصنوعات کی قیمتوں میں مزید کمی آئی ہے۔ اس کے بعد سے آج بھی پٹرول اور ڈیزل کی قیمتیں ریکارڈ سطح پر برقرار ہیں۔

یوروپی ممالک میں کورونا کے دوبارہ پھیلاؤ کے باعث لاک ڈاؤن کی ناگزیریت کے سبب طلب میں کمی نے بین الاقوامی منڈی میں خام تیل کی قیمتوں کو جھٹکا دیا ہے۔ عالمی سطح پر برینٹ کروڈ جمعہ کو 79 ڈالر فی بیرل سے نیچے آگیا۔ اس کی وجہ سے پیر کو 18ویں دن بھی گھریلو بازار میں پٹرول اور ڈیزل کی قیمتوں میں کوئی تبدیلی نہیں ہوئی۔ دارالحکومت دہلی میں ملک کی سب سے بڑی آئل مارکیٹنگ کمپنی انڈین آئل کارپوریشن لمیٹڈ (آئی او سی ایل ) کے پمپ پر پٹرول کی قیمت 103.97 روپے فی لیٹر اور ڈیزل کی قیمت 86.67 روپے فی لیٹر رہی۔

پٹرول اور ڈیزل کی قیمتوں کا روزانہ جائزہ لیا جاتا ہے اور اس کی بنیاد پر نئی قیمتیں ہر روز صبح 6 بجے سے لاگو ہوتی ہیں۔ آج ملک کے چار بڑے میٹرو میں پٹرول اور ڈیزل کی قیمتیں کچھ یوں رہیں:

شہر کا نام——پٹرول (روپے/لیٹر)——(ڈیزل روپے/لیٹر)

دہلی ——————- 103.97——————-86.67

ممبئی——————-109.98 —————— 94.14

چنئی ——————-101.40 ——————-91.43

کولکتہ ——————-104.67——————-89.79