کرکٹ: پاکستان کو لگا جھٹکا، سری لنکائی کرکٹروں نے پاکستان دورہ سے کیا انکار

کولمبو: سری لنکا کرکٹ ٹیم کے سینئر کھلاڑیوں نے رواں ماہ پاکستان میں ہونے والی ونڈے اور ٹی-20 سیریز کے لئے پاکستان آکر کھیلنے سے انکار کردیا ہے۔

سری لنکا کے وزیرکھیل ہارین فرنانڈو نے گزشتہ ماہ ایک پریس کانفرنس کی تھی جس میں انہوں نے اعلان کیا تھا کہ سری لنکا کرکٹ ٹیم پاکستان جا کر ونڈے اور ٹی -20 سیریز کھیلے گی، اس پریس کانفرنس کے بعد پی سی بی کے چیئرمین احسان مانی نے سری لنکا کے وزیر کھیل ہارین فرنانڈو سے ٹیلی فونک رابطہ کیا تھا، جس میں یہ طے ہوا تھا کہ رواں ماہ سری لنکا کرکٹ ٹیم پاکستان آکر ونڈے اور ٹی -20 سریز کھیلے گی اور اس کے بعد دونوں ممالک کے درمیان ٹسٹ سیریز کا انعقاد کیا جائے گا۔

اب سری لنکا کرکٹ ٹیم کے متعدد سینئر کھلاڑیوں نے پاکستان آکر کھیلنے سے منع کردیا ہے، انکار کرنے والے کھلاڑیوں میں ٹی -20 کرکٹ ٹیم کے کپتان لستھ ملنگا، ونڈے کرکٹ ٹیم کے کپتان دیموتھ کرونارتنے اور سری لنکن کرکٹ ٹیم کے سابق کپتان اینجیلو میتھیوز شامل ہیں۔

’جنگ‘ کے مطابق وزیرکھیل ہارین فرنانڈو کے مطابق کھلاڑیوں کے انکار کرنے کی وجہ ان کے اہل خانہ ہیں جنہوں نے سیکیورٹی خدشات کی وجہ سے کھلاڑیوں کو سیریز کھیلنے کے لیے پاکستان جانے سے منع کردیا ہے۔سری لنکا کے وزیرکھیل کا کہنا ہے کہ’ ’میں خود کھلاڑیوں کے ساتھ پاکستان آنے کے لئے تیار ہوں۔‘‘ انہوں نے کہا کہ ’’کھلاڑیوں کو راضی کرنے کے لئے سری لنکا کرکٹ حکام 9 ستمبر کو تمام کھلاڑیوں سے ملاقات کریں گے۔‘‘

دوسری جانب پاک سری لنکا سیریز کے لیے ٹکٹوں کی فروخت کا سلسلہ یوم عاشورہ کے بعد شروع کیا جائے گا، ٹکٹ کی کم از کم قیمت 500 روپے مقرر کی گئی ہے۔ ذرائع کے مطابق پہلے مرحلے میں ٹکٹ آن لائن دستیاب ہوں گے اور اُس کے بعد ٹکٹ نجی کورئیر کمپنی کے ذریعے فروخت کیے جائیں گے۔

واضح رہے کہ پاک سری لنکا سریز کا شیڈول بھی جاری کردیا گیا ہے، شیڈول کے مطابق ون ڈے میچز 27 و 29 ستمبر اور 2 اکتوبر کو کراچی کے نیشنل اسٹیڈیم میں کھیلے جائیں گے جبکہ ٹی-20 میچز 5، 7 اور 9 اکتوبر کو لاہور کے قذافی اسٹیڈیم میں کھیلے جائیں گے۔