ویڈیو: بی جے پی کو دہلی میں ہرانے کے لئے ہمیں اتحادی کی ضرورت نہیں، ہارون یوسف

قومی آواز سے گفتگو کے دوران دہلی کانگریس کے کارگزار صدر ہارون یوسف نے کہا کہ کانگریس اپنے دم پر مضبوط جماعت ہے اور بی جے پی کو دہلی میں ہرانے کے لئے اسے کسی اتحادی کی ضرورت نہیں ہے۔ انہوں نے کہا کہ دہلی کی کیجریوال حکومت کے جھوٹے وعدوں سے لوگ اب عاجز آ چکے ہیں۔

انہوں نے کہا کہ کیجریوال حکومت چنندہ ایشوز پر تشہیر کرتی ہے جبکہ حقیقت کچھ اور ہے۔ انہوں نے کہا کہ جس طرح تین ہندی بیلٹ کی ریاستوں میں کانگریس نے بی جے پی کو شکست دی ہے اسی طرح دہلی میں بھی بی جے پی کو ہرانے کا دم کانگریس میں ہے۔

ہارون یوسف نے کہا کہ آنے والے لوک سبھا انتخابات میں بی جے پی اور عام آدمی پارٹی دونوں کو ہی دہلی کے لوگ مسترد کر دیں گے۔

واضح رہے کہ ہارون یوسف کو حال ہی میں دہلی پردیش کانگریس کمیٹی کا کارگزار صدر مقرر کیا گیا ہے۔ ان کے علاوہ دیگر دو کارگزار صدر بھی مقرر کئے گئے ہیں جبکہ دہلی کانگریس کی باگ ڈور شیلا دیکشت کو سونپی گئی ہے۔