جے پور میں وزیر اعلیٰ بھجن لال شرما کے قافلے کے دوران مچی افراتفری، تیز رفتار بس نے 8 کاروں کو ماری ٹکر

راجستھان کی راجدھانی جے پور میں وزیر اعلیٰ بھجن لال شرما کے قافلے کے گزرنے سے قبل ایک بڑا سڑک حادثہ پیش آیا۔ سیکر روڈ کے ہرماڑہ علاقے میں ٹریفک روکے جانے کے دوران ایک تیز رفتار سلیپر بس کھڑی گاڑیوں کی قطار میں جا گھسی۔ حادثے میں بس نے پیچھے سے ایک کے بعد ایک 8 کاروں کو ٹکر مار دی۔ کئی گاڑیاں بری طرح تباہ ہو گئیں، جبکہ ایک کار ڈیوائیڈر پر چڑھ گئی۔ حادثے کے بعد موقع پر چیخ و پکار اور افراتفری مچ گئی۔

موصولہ اطلاعات کے مطابق سیکر روڈ پر واقع سن سٹی کے پاس شام تقریباً 6:15 بجے وزیر اعلیٰ کے قافلے کو محفوظ طریقے سے گزارنے کے لیے ٹریفک کو روکا گیا تھا۔ سڑک پر گاڑیوں کی لمبی قطار لگی ہوئی تھی۔ اسی دوران جے پور سے سیکر کی طرف جانے والی ایک نجی کمپنی کی سلیپر بس تیز رفتاری سے پیچھے سے آئی اور کھڑی گاڑیوں سے ٹکرا گئی۔ عینی شاہدین کے مطابق بس کی رفتار اتنی تیز تھی کہ ٹکر لگتے ہی کئی گاڑیاں آگے تک گھسٹتی چلی گئیں۔

حادثے کے بعد کئی لوگ اپنی کاروں میں پھنس گئے۔ راجستھان پولیس کی ہرماڑہ تھانہ پولیس نے مقامی لوگوں کی مدد سے فوراً ریسکیو آپریشن شروع کیا۔ تباہ شدہ گاڑیوں میں پھنسے 6 لوگوں کو سخت جدوجہد کے بعد باہر نکالا گیا۔ ایک ٹیکسی کار کا پچھلا حصہ پوری طرح چکنا چور ہو گیا تھا۔ کار میں پھنسی ایک خاتون اور نوجوان کو نکالنے کے لیے پولیس اہلکاروں نے پیچھے کا گیٹ لات مار کر توڑا۔ زخمی نوجوان سیٹوں کے درمیان بری طرح دب گیا تھا اور اس کے سر میں شدید چوٹ آئی تھی۔ پولیس اہلکاروں نے اسے فوراً نجی ہسپتال پہنچایا۔

حادثے میں زخمی سانگانیر کے رام پورہ کے رہائشی امن جین اپنی بیوی پریانشی جین، ساس ریکھا جین اور چچا سسر راجیش کے ساتھ کھاٹو شیام جی کے درشن کے لیے جا رہے تھے۔ حادثے کے بعد چاروں کو سی کے ایس اسپتال میں داخل کرایا گیا۔ ریکھا جین اور پریانشی جین کا سٹی اسکین  کرایا گیا، جبکہ شدید زخمی امن جین کو بعد میں ایس ایم ایس اسپتال ریفر کر دیا گیا۔

پولیس تحقیقات میں سامنے آیا ہے کہ حادثہ بس کے بریک فیل ہونے کی وجہ سے پیش آیا۔ نجی سلیپر بس احمد آباد سے مسافروں کو لے کر کھاٹو شیام جی کے درشن کے لیے نکلی تھی اور وہاں سے ہری دوار جانے والی تھی۔ حادثے کے بعد بس ڈرائیور موقع سے فرار ہو گیا۔ پولیس نے بس کو قبضے میں لے لیا ہے اور ڈرائیور کی تلاش شروع کر دی ہے۔

قابل ذکر ہے کہ وزیر اعلیٰ بھجن لال شرما کا قافلہ حادثے سے کچھ منٹ قبل ہی جائے وقوعہ سے گزر چکا تھا۔ واقعے کے بعد سیکر روڈ پر لمبا جام لگ گیا اور کافی دیر تک ٹریفک متاثر رہا۔ دوسری طرف بس میں سوار مسافروں کو دوسری بس سے روانہ کیا گیا۔