بی جے پی رکن پارلیمنٹ ورون گاندھی نے ’راشن کارڈ‘ معاملہ پر یوگی حکومت کو گھیرا

بی جے پی رکن پارلیمنٹ ورون گاندھی نے ایک بار پھر اپنی ہی حکومت کو تنقید کا نشانہ بنایا ہے۔ انھوں نے راشن کارڈ کو لے کر یوگی حکومت پر حملہ بولا ہے۔ انھوں نے ٹوئٹ کر کے کہا کہ انتخاب سے پہلے اہل اور انتخاب کے بعد نااہل؟ عوام کی زندگی کو متاثر کرنے والے سبھی فیصلے اگر ’انتخاب‘ دیکھ کر طے کیے جائیں گے تو حکومتیں اپنا اعتبار گنوا دیں گی۔ انتخاب ختم ہوتے ہی راشن کارڈ سے محروم ہونے والے کروڑوں باشندوں کی یاد حکومت کو اب کب آئے گی؟ شاید اگلے انتخاب میں...!

دراصل یوگی حکومت نااہل راشن کارڈ ہولڈرس پر کارروائی کرنے جا رہی ہے۔ کارروائی سے پہلے حکومت نے سبھی نااہل کارڈ ہولڈرس سے اپنا راشن کارڈ جمع کرنے کو کہا ہے۔ ایسے میں اگر کوئی نااہل کارڈ ہولڈر طے وقت پر کارڈ جمع نہیں کرتا ہے تو اس پر جرمانے کی کارروائی ہوگی۔