بہار اسمبلی انتخابات: بہار میں دوسرے مرحلے کی پولنگ ختم، 68.48 فیصد ہوئی ووٹنگ، ٹوٹ گئے ریکارڈ

بہار اسمبلی انتخاب کے دوسرے مرحلے کی پولنگ ختم ہو چکی ہے۔ اب تک موصول اعداد و شمار کے مطابق دوسرے مرحلہ میں 68.48 فیصد ووٹنگ ہوئی ہے، جو کہ تاریخ ساز ہے۔ بہار میں اب تک اتنی بڑی تعداد میں ووٹنگ دیکھنے کو نہیں ملی تھی۔ حالانکہ حتمی اعداد و شمار آنے ابھی باقی ہیں۔ یعنی ووٹنگ کا فیصد مزید بڑھنے کا قوی امکان ہے۔

بہار میں دوسرے مرحلہ کے تحت ووٹنگ کا عمل جاری ہے۔ ووٹرس اپنے حق رائے دہی کو لے کر پورے جوش میں ہیں۔ خواتین اور نوجوان طبقہ بڑی تعداد میں پولنگ مراکز پر پہنچا ہے، جس کا نتیجہ یہ ہے کہ شام 5 بجے تک ہی 67.14 فیصد تک ووٹنگ درج کی گئی ہے۔ یہ اپنے آپ میں ایک ریکارڈ ہے۔ بہار کی انتخابی تاریخ میں اتنی ووٹنگ کبھی نہیں ہوئی۔ چونکہ ووٹنگ کا عمل جاری ہے، اس لیے ووٹنگ فیصد میں مزید اضافہ یقینی ہے۔

بہار میں اسمبلی انتخابات کے دوسرے اور آخری مرحلہ کی ووٹنگ کا سلسلہ لگاتار جاری ہے۔ الیکشن کمیشن کے اعداد و شمار کے مطابق دوپہر ایک بجے تک تمام سیٹوں پر مجموعی طور پر 47.62 فیصد ووٹروں نے اپنے حق رائے دہی کا استعمال کر لیا تھا۔

بہار اسمبلی انتخابات کے آخری مرحلے میں جوش و خروش کے ساتھ ووٹنگ جاری ہے۔ صبح 11 بجے تک 31.38 فیصد ووٹنگ ریکارڈ کی گئی۔ کشن گنج میں سب سے زیادہ 34.74 فیصد، گیا میں 34.07 فیصد اور جموئی میں 33.69 فیصد ووٹنگ درج کی گئی۔

ریاستی چیف الیکشن آفیسر کے دفتر کی جانب سے صبح 9 بجے تک ووٹنگ کے اعداد و شمار جاری کیے گئے، جن کے مطابق مجموعی طور پر 14.55 فیصد ووٹ ڈالے گئے۔ الیکشن کمیشن سے موصول معلومات کے مطابق مغربی چمپارن میں 15.04 فیصد، مشرقی چمپارن میں 14.11 فیصد، شیوہر میں 13.94 فیصد، سیتامڑھی میں 13.49 فیصد، مدھوبنی میں 13.25 فیصد، سپول میں 14.85 فیصد، ارریہ میں 15.34 فیصد، کشن گنج میں 15.81 فیصد، پورنیہ میں 15.54 فیصد، کٹیہار میں 13.77 فیصد، بھاگلپور میں 13.43 فیصد، بانکا میں 15.14 فیصد، کیمور (بھوبھوا) میں 15.08 فیصد، روہتاس میں 14.16 فیصد، اراول میں 14.95 فیصد، جہان آباد میں 13.81 فیصد، اورنگ آباد میں 15.43 فیصد، گیا میں 15.97 فیصد، نوادہ میں 13.46 فیصد اور جموئی میں 15.77 فیصد ووٹنگ درج کی گئی ہے۔

ارریہ ضلع کے جوگ بنی مڈل اسکول کے بوتھ نمبر 15، کوچ گاما اسکول کے بوتھ نمبر 34 اور بگوا کے بوتھ نمبر 37 پر ایک گھنٹے تک ای وی ایم خراب ہونے کی وجہ سے ووٹنگ کے عمل میں تاخیر ہوئی۔ اس کے علاوہ سیتامڑھی کے بوتھ نمبر 293 پر بھی ای وی ایم کی خرابی کے باعث ووٹنگ میں رکاوٹ پیش آئی۔

پورنیہ سے آزاد رکن پارلیمنٹ پپو یادو نے کہا، ’’بہار ایس آئی آر عمل کے بعد 69 لاکھ ووٹروں کے نام حذف کر دیے گئے، تو پھر پہلے مرحلے میں ووٹنگ کی شرح کیسے بڑھ گئی؟ بہار ایک بڑے تبدیلی کے دوراہے پر ہے۔ نئی نسل (جنریشن زیڈ) تبدیلی چاہتی ہے۔ وزیر اعظم کٹّا، بم، ڈکیتی جیسی زبان کیوں استعمال کر رہے ہیں؟ کیا اس طرح کی زبان وزیر اعظم کو زیب دیتی ہے؟ وزیر اعظم کبھی بھی بہار کے مسائل پر ووٹ کی اپیل نہیں کرتے۔ بہار کے عوام تبدیلی چاہتے ہیں۔‘‘

بہار اسمبلی انتخابات کے دوسرے اور آخری مرحلے کی ووٹنگ جاری ہے۔ صبح 7 بجے شروع ہونے والا عمل شام 5 بجے تک جاری رہے گا۔ اس مرحلے میں 122 اسمبلی نشستوں پر ووٹ ڈالے جا رہے ہیں، جہاں 3 کروڑ 70 لاکھ سے زائد ووٹر کل 1302 امیدواروں کی قسمت کا فیصلہ کریں گے۔ ان امیدواروں میں وزیراعلیٰ نتیش کمار کی حکومت کے چھ سے زیادہ وزراء بھی شامل ہیں جن کی ساکھ داؤ پر لگی ہے۔

الیکشن کمیشن کے مطابق، اس مرحلے میں 45 ہزار 399 پولنگ مراکز قائم کیے گئے ہیں جن میں سے 40 ہزار 73 دیہی علاقوں میں واقع ہیں۔ کل ووٹروں میں 1.75 کروڑ خواتین شامل ہیں۔ نوادہ کی ہسوا نشست پر سب سے زیادہ 3.67 لاکھ ووٹر ہیں، جبکہ لوریہ، چنپٹیا، رکسول، تریونی گنج، سُگولی اور بنمکی میں امیدواروں کی تعداد سب سے زیادہ 22-22 ہے۔

پہلے مرحلے میں 121 نشستوں پر پولنگ ہوئی تھی، جس میں 65 فیصد سے زیادہ ووٹ ڈالے گئے تھے۔ دوسرے مرحلے کی ووٹنگ بنیادی طور پر سیمانچل اور ترائی کے علاقوں میں ہو رہی ہے، جن میں مغربی چمپارن، مشرقی چمپارن، سیتامڑھی، مدھوبنی، سپول، ارریہ اور کشن گنج جیسے اضلاع شامل ہیں۔ یہ تمام علاقے نیپال کی سرحد سے متصل ہیں، جہاں ووٹروں کی حفاظت کو مدِنظر رکھتے ہوئے چار لاکھ سے زائد سکیورٹی اہلکار تعینات کیے گئے ہیں۔