’ہمارا اخلاق دیکھ کر ایک دن تم بھی داڑھی رکھنے لگو گے‘

ہریانہ کے گروگرام میں مسلم نوجوان کی داڑھی کاٹنے سے متعلق اے آئی ایم آئی ایم سربراہ اسدالدین اویسی نے سخت رد عمل ظاہر کیا ہے۔ انھوں نے کہا کہ ’’داڑھی کاٹنے والوں اور ان کے والدین سے میں یہ کہنا چاہتا ہوں کہ اگر آپ گلا بھی کاٹ دیں گے تو بھی ہم مسلم ہی رہیں گے۔ ہم آپ کو بھی اسلام میں شامل کریں گے اور داڑھی رکھوائیں گے۔‘‘

حیدر آباد میں ایک جلسہ سے خطاب کرتے ہوئے اویسی نے یہ باتیں کہیں۔ انھوں نے اپنے بیان کی مزید تشریح کرتے ہوئے کہا کہ ’’ظلم کرنے والو! داڑھی کاٹنے سے ہم داڑھی رکھنا بند نہیں کر دیں گے۔ ہم اور بڑی داڑھی رکھیں گے اور اپنے اخلاق و سچائی سے ہم تمہیں بھی اسلام میں شامل کر لیں گے۔‘‘

قابل ذکر ہے کہ 31 جولائی کو گروگرام میں مسلم نوجوان کی داڑھی کاٹنے کا معاملہ سامنے آیا تھا۔ مسلم نوجوان نے بتایا تھا کہ ایک سیلون میں بیٹھے دو نوجوانوں نے اس کی داڑھی زبردستی کاٹ دی اور منع کرنے پر اس کی پٹائی بھی کی گئی تھی۔ میڈیا میں خبر آنے کے بعد پولس حرکت میں آئی تھی اور کیس درج کر کےاس معاملے میں تین لوگوں کو گرفتار بھی کیا تھا۔