یوگی حکومت کی کابینہ توسیع پر اکھلیش یادو کا طنز، ’6 آسامیاں ہیں... باقی دَل بدلوؤں کا کیا ہوگا‘؟

سماجوادی پارٹی (ایس پی) کے سربراہ اکھلیش یادو نے یوگی حکومت کی آئندہ کابینہ توسیع پر سخت حملہ بولا ہے۔ انہوں نے سوال کیا کہ جب کابینہ میں صرف 6 عہدے خالی ہیں تو دوسری پارٹیوں سے آنے والے رہنماؤں میں سے کس کو وزیر بنایا جائے گا اور انتخاب کی بنیاد کیا ہوگی۔ اکھلیش نے کہا کہ جن ’دل بدلوؤں‘ (پارٹی بدلنے والے لیڈر) کو جگہ نہیں ملے گی وہ خود کے ساتھ دھوکہ محسوس کریں گے۔ انہوں نے بی جے پی پر اتحادیوں اور پرانے کارکنوں کو نظر انداز کرنے کا الزام لگایا۔ اس کے ساتھ ہی اکھلیش نے کہا کہ حکومت 9 سال میں جو نہیں کر سکی، وہ آخری 9 ماہ میں بھی نہیں ہوگا۔ ان کے مطابق بی جے پی حکومت میں بدعنوانی، بے روزگاری اور مہنگائی میں مسلسل اضافہ ہوا ہے۔

اکھلیش یادو نے سوال کیا کہ کیا بی جے پی سب کو وزیر کا عہدہ دے کر اعزاز سے نوازے گی یا پھر کچھ چنندہ لوگوں کو موقع ملے گا۔ انہوں نے طنزیہ انداز میں پوچھا کہ کیا سب سے کمزور لیڈروں کو وزیر بنا کر ان کی کمزوری چھپانے کی کوشش کی جائے گی۔ انہوں نے کہا کہ اگر کسی ایک سماج کے کئی ایم ایل اے وزارتی عہدوں کی دوڑ میں ہیں اور ان میں سے صرف ایک کو منتخب کیا جاتا ہے تو باقی لیڈروں میں ناراضگی بڑھنا طے ہے۔ ایسے میں انتخاب کی بنیاد کیا ہوگی، یہ بھی بڑا سوال ہے۔

ایس پی سربراہ نے کہا کہ دوسری پارٹیوں کو چھوڑ کر بی جے پی میں شامل ہونے والے لیڈروں کو اگر وزارت کا عہدہ نہیں ملا تو وہ خود کے ساتھ دھوکہ محسوس کریں گے۔ انہوں نے کہا کہ ایسے لیڈروں کے لیے اپنے حلقوں میں عوام کا سامنا کرنا بھی مشکل ہو جائے گا۔ بی جے پی کو نشانہ بناتے ہوئے اکھلیش یادو نے کہا کہ اب کئی لیڈروں کو یہ احساس ہو جائے گا کہ بی جے پی کسی کی دوست نہیں ہے۔

انہوں نے بی جے پی کے پرانے لیڈروں اور کارکنوں کے حوالے سے بھی سوالات اٹھائے۔ اکھلیش نے پوچھا کہ جو لوگ برسوں سے وزیر بننے کی امید لگائے بیٹھے ہیں ان کا کیا ہو گا؟ اگر باہر سے آئے لیڈروں کو ترجیح دی گئی تو پرانے کارکنوں میں ناراضگی بڑھ سکتی ہے۔ انہوں نے کہا کہ اگر موجودہ وزراء کے قلمدان کم کیے جاتے ہیں یا ان سے وزارت چھین لی جاتی ہے تو عوام میں یہ پیغام جائے گا کہ وہ اپنے کام میں کامیاب نہیں رئے۔ اکھلیش یادو نے بی جے پی کے حلیفوں پر بھی حملہ بولا۔ انہوں نے کہا کہ بی جے پی اپنے اتحادیوں کو صرف انتظار کرواتی ہے اور پھر وقت آنے پر کنارے کردیتی ہے۔ انہوں نے طنزیہ انداز میں کہا کہ جن کے سہارے آئے تھے، وہ اب تمہارے نہیں رہے۔