یوگی آدتیہ ناتھ کے دورۂ سنگاپور پر اکھلیش یادو کا طنز، ’ٹوٹی ٹنکی‘ اور مشہور فوارے کا کیا موازنہ

سماج وادی پارٹی کے قومی صدر اکھلیش یادو نے اتر پردیش کے وزیر اعلیٰ یوگی آدتیہ ناتھ کے دورۂ سنگاپور پر طنزیہ حملہ کرتے ہوئے ریاست میں بنیادی سہولیات کی صورتحال کو نشانہ بنایا ہے۔ انہوں نے اپنے سوشل میڈیا پلیٹ فارم ایکس پر دو تصویریں شیئر کیں، جن میں ایک تصویر میں ٹوٹی ہوئی پانی کی ٹنکی سے بہتی دھار دکھائی دے رہی ہے، جبکہ دوسری تصویر میں سنگاپور کی مشہور علامت مرلیون نظر آ رہی ہے، جو وہاں کی شناخت اور سیاحتی کشش کی علامت سمجھی جاتی ہے۔

اکھلیش یادو نے اپنی پوسٹ میں لکھا کہ جب وزیر اعلیٰ ’خوشگوار سفر‘ پر جا ہی رہے ہیں تو وہ سنگاپور میں یہ ضرور دیکھ کر آئیں کہ پانی کی دھار کتنی دلکش ہو سکتی ہے۔ انہوں نے طنزیہ انداز میں کہا کہ ان کے دور حکومت میں پانی کی دھار صرف ٹوٹی ہوئی ٹنکیوں یا پھٹے ہوئے پائپوں سے نکلتی ہے۔ اکھلیش نے مزید لکھا کہ جب وہ یہ منظر دیکھیں گے تو آنکھیں کھلی کی کھلی رہ جائیں گی۔ انہوں نے حکومت پر تنقید کرتے ہوئے کہا کہ یہ سب کام اپنی گنتی کی طرح الٹے کرتے ہیں اور جب رخصتی کا وقت قریب ہے تو آخری سال میں ’سیرِ تجربہ‘ پر روانہ ہو رہے ہیں۔

سیاسی حلقوں میں اکھلیش یادو کے اس بیان کو آئندہ انتخابی ماحول سے جوڑ کر دیکھا جا رہا ہے، جہاں اپوزیشن ریاستی حکومت کی کارکردگی کو مسلسل موضوع بنا رہی ہے۔ پانی کی فراہمی اور شہری بنیادی ڈھانچے سے متعلق مسائل پہلے بھی سیاسی بحث کا حصہ رہے ہیں اور اپوزیشن جماعتیں انہیں عوامی ناراضگی کا سبب قرار دیتی رہی ہیں۔

ادھر وزیر اعلیٰ یوگی آدتیہ ناتھ دو روزہ دورے پر سنگاپور پہنچے ہیں۔ سرکاری بیان کے مطابق اس دورے کا مقصد بیرونی سرمایہ کاری کو راغب کرنا اور اتر پردیش میں صنعتی مواقع کو فروغ دینا ہے۔ اپنے قیام کے دوران وہ سنگاپور کے وزیر اعظم اور صدر سے ملاقات کریں گے۔ اس کے علاوہ پچیس بڑی کمپنیوں کے نمائندوں کے ساتھ سرمایہ کاری کے امکانات پر تبادلہ خیال بھی طے ہے۔ وزیر اعلیٰ سنگاپور میں مقیم ہندوستانی برادری سے خطاب بھی کریں گے۔

سنگاپور کے بعد یوگی آدتیہ ناتھ جاپان کے دو روزہ دورے پر روانہ ہوں گے، جہاں صنعتی اشتراک اور سرمایہ کاری سے متعلق مزید ملاقاتیں متوقع ہیں۔