
Getty Images
شینزن: چین کے صدر شی جن پنگ کی موجودگی میں روس کے صدر ولادیمیر پوتن اور امریکی صدر ڈونالڈ ٹرمپ کے درمیان مصافحہ اور خیرسگالی کے تبادلے کو روسی میڈیا بڑی سفارتی کامیابی کے طور پر پیش کر رہا ہے۔ چین کے شہر شینزن میں ایشیا پیسیفک اقتصادی تعاون (ایپیک) سربراہی اجلاس کے موقع پر تینوں عالمی رہنماؤں کی ایک ساتھ موجودگی کو روسی ذرائع ابلاغ نے خاص اہمیت دی ہے۔
کریملن کی جانب سے ٹیلی گرام پر جاری ویڈیو میں پوتن، ٹرمپ اور شی جن پنگ کو ریڈ کارپٹ پر ایک ساتھ دیکھا جا سکتا ہے۔ ویڈیو میں ٹرمپ، شی جن پنگ اور ان کی اہلیہ موجود ہوتے ہیں کہ اسی دوران پوتن وہاں پہنچتے ہیں اور ٹرمپ سے مصافحہ کرتے ہیں۔ اس کے بعد دونوں رہنما ایک دوسرے کے کندھے پر ہاتھ رکھ کر خیرسگالی کا اظہار بھی کرتے ہیں۔
روسی میڈیا کے بعض اداروں نے اس منظر کو دن کی سب سے اہم تصویر قرار دیا، جب کہ ایک سرکاری خبر رساں ایجنسی نے اسے ’تاریخی مصافحہ‘ کا نام دیا۔ بی بی سی روسی سروس کی صحافی لیزا فوخت کے مطابق یہ وہی تصویر ہے جسے کریملن دنیا کے سامنے پیش کرنا چاہتا تھا۔
ان کے تجزیے کے مطابق روس اس ملاقات کے ذریعے عالمی سیاست میں اپنی اہمیت اور اثر و رسوخ کا اظہار کرنے کی کوشش کر رہا ہے۔ اگرچہ روس دنیا کی تین بڑی معیشتوں میں شامل نہیں ہے، لیکن پوتن اس موقع پر خود کو شی جن پنگ اور ڈونالڈ ٹرمپ کے برابر ایک اہم عالمی رہنما کے طور پر پیش کرتے دکھائی دے رہے ہیں۔
ماسکو کے لیے اس ملاقات کی اہمیت محض تین عالمی رہنماؤں کی ایک ساتھ موجودگی تک محدود نہیں ہے۔ روس یہ پیغام دینا چاہتا ہے کہ یوکرین جنگ کے بعد اسے بین الاقوامی سطح پر الگ تھلگ کرنے کی مغربی ممالک کی کوششیں کامیاب نہیں ہوئی ہیں اور وہ اب بھی عالمی سیاست کے اہم کھلاڑیوں میں شامل ہے۔
قابل ذکر ہے کہ اگست 2025 میں الاسکا میں روس اور امریکہ کے درمیان ہونے والی سربراہی ملاقات کے بعد پوتن اور ٹرمپ کی یہ پہلی بالمشافہ ملاقات ہے۔ اس اعتبار سے بھی دونوں رہنماؤں کا ایک دوسرے سے مصافحہ کرنا سفارتی حلقوں میں اہمیت کا حامل سمجھا جا رہا ہے۔
دریں اثنا، شی جن پنگ، پوتن اور ٹرمپ کے درمیان سہ فریقی سربراہی ملاقات بھی کل متوقع ہے۔ یہ پہلی مرتبہ ہوگا جب تینوں رہنما ایک ساتھ باضابطہ سہ فریقی اجلاس میں شرکت کریں گے۔ تاہم تجزیہ کاروں کا خیال ہے کہ اس ملاقات سے کسی بڑے عملی یا ٹھوس نتیجے کی توقع کم ہے۔ اس کے باوجود روس کے لیے اس کی علامتی اہمیت کہیں زیادہ ہے۔
پوتن کی موجودگی اور عالمی میڈیا کی توجہ کریملن کو یہ پیغام دینے کا موقع فراہم کرتی ہے کہ یوکرین جنگ کے باوجود روس عالمی منظرنامہ سے غائب نہیں ہوا ہے۔ یوں ماسکو اس ملاقات کو اپنی سفارتی حیثیت اجاگر کرنے اور عالمی سیاست میں اپنے اثر و رسوخ کے برقرار رہنے کا ثبوت پیش کرنے کی کوشش کر رہا ہے۔
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔