مغربی ایشیا کشیدگی کے سائے میں شیئر بازار مسلسل چھٹے ہفتے گرا، ٹرمپ کے بیان نے بڑھائی غیر یقینی

مغربی ایشیا میں بڑھتے ہوئے جغرافیائی سیاسی تناؤ اور کرنسی میں تیزی سے ہونے والے اتار چڑھاؤ کے باعث ہندوستانی شیئر بازار مسلسل چھٹے ہفتے بھی گراوٹ کے ساتھ بند ہوا۔ چار دن کے محدود کاروباری ہفتے میں دونوں اہم اشاریے منفی دائرے میں رہے، جس سے سرمایہ کاروں کے اعتماد پر واضح اثر پڑا۔

بی ایس ای سینسیکس جمعرات کو 73,319.55 پر بند ہوا، جو پچھلے ہفتے کے مقابلے میں 263.67 پوائنٹس یعنی 0.35 فیصد کم ہے۔ اسی طرح نفٹی 50 بھی ہفتہ وار بنیاد پر 106.50 پوائنٹس یعنی 0.46 فیصد کی کمی کے ساتھ 22,713.10 پر بند ہوا۔ ہفتے کے آخری کاروباری دن کے دوران بازار میں زبردست گراوٹ دیکھنے کو ملی، جہاں ابتدائی کاروبار میں نفٹی 500 سے زیادہ پوائنٹس نیچے آیا اور سینسیکس میں 1,500 پوائنٹس سے زیادہ کی کمی درج ہوئی۔

یہ اچانک گراوٹ اس وقت سامنے آئی جب امریکی صدر ڈونالڈ ٹرمپ نے اشارہ دیا کہ اگلے دو سے تین ہفتوں میں ایران کے خلاف سخت فوجی کارروائی ممکن ہے۔ اس بیان نے عالمی سطح پر بے یقینی کو بڑھا دیا، جس کا سیدھا اثر ہندوستانی بازار پر بھی پڑا۔ تاہم دن کے اختتام تک کچھ حد تک بحالی دیکھنے کو ملی، لیکن مجموعی رجحان منفی ہی رہا۔

نفٹی 50 میں شامل کمپنیوں میں ایچ ڈی ایف سی لائف انشورنس، سن فارما، ڈاکٹر ریڈیز لیبارٹریز، این ٹی پی سی اور سِپلا اس ہفتے سب سے زیادہ نقصان اٹھانے والے شیئرز میں شامل رہے۔ وسیع بازاروں میں بھی دباؤ دیکھا گیا، جہاں بی ایس ای مڈکیپ 150 میں 0.6 فیصد کی کمی آئی، جبکہ بی ایس ای اسمال کیپ 250 نے اس کے برعکس 0.8 فیصد کی ہلکی بڑھوتری درج کی۔

سیکٹر کے لحاظ سے رئیلٹی، ہیلتھ کیئر اور بینکنگ شعبوں میں کچھ بہتری دیکھی گئی، جبکہ میٹل، پاور اور کنزیومر ڈیو ریبلز کے شعبے نمایاں نقصان میں رہے۔ ماہرین کے مطابق بازار کی سمت کا انحصار اب بڑی حد تک مغربی ایشیا کی صورتحال پر ہے۔

ان کا کہنا ہے کہ اگر کشیدگی میں کمی آتی ہے تو خام تیل کی قیمتوں میں نرمی اور کرنسی میں استحکام ممکن ہے، جس سے بازار کو سہارا مل سکتا ہے۔ تاہم کشیدگی بڑھنے کی صورت میں غیر ملکی سرمایہ کاری پر دباؤ بڑھے گا اور بازار میں کمزوری برقرار رہ سکتی ہے۔

فی الحال برینٹ کروڈ کی قیمت تقریباً 107 ڈالر فی بیرل کے آس پاس ہے، جو بازار کے لیے ایک اہم تشویش بنی ہوئی ہے۔ آنے والے ہفتے میں سرمایہ کار ریزرو بینک کی مانیٹری پالیسی کمیٹی کے فیصلے، امریکی ایف او ایم سی کے منٹس اور مالی سال 2026 کی چوتھی سہ ماہی کے نتائج پر گہری نظر رکھیں گے۔ جمعہ کو گڈ فرائیڈے کے باعث بازار بند رہے، اور اب پیر سے دوبارہ کاروبار شروع ہوگا۔