امریکہ-ایران مذاکرات کے درمیان نیتن یاہو کا اعلان، جنوبی لبنان میں موجود رہے گی اسرائیلی فوج، حزب اللہ کو بتایا بڑا خطرہ

ایسے وقت میں جب روایتی حریف امریکہ اور ایران مغربی ایشیا میں جنگ بندی اور قیام امن کے مقصد کے تحت ایک میز پر گفت و شنید میں مصروف ہیں، وہیں بینجامن نیتن یاہو ان کوششوں کو سبوتاژ کرتے نظر آ رہے ہیں۔ اسرائیل کے وزیر اعظم  نیتن یاہو نے اتوار کے روز کہا کہ اسرائیلی افواج جنوبی لبنان میں قائم کئے گئے سیکورٹی زون میں اس وقت تک تعینات رہیں گی جب اسرائیل کے لوگوں کی حفاظت کے لیے اس کی ضرورت ہوگی۔ انہوں نے اس بات کا اعادہ کیا کہ اسرائیل کسی بھی قیمت پر ایران کو جوہری ہتھیار نہیں بنانے دے گا۔ نیتن یاہو نے یہ باتیں یروشلم میں جے این ایس انٹرنیشنل پالیسی سمٹ 2026 کے دوران کہیں۔

نیتن یاہو نے دعویٰ کیا کہ اسرائیل نے ایران کے اس منصوبے کو ناکام کر دیا جس سے وہ جوہری بم بنا کر اسرائیل کے لیے بڑا خطرہ بن سکتا تھا۔ انہوں نے دعویٰ کیا کہ اگر اسرائیل نے ’آپریشن رائزنگ لائن‘ اور ’آپریشن روورنگ لائن‘ نہیں چلائے ہوتے تو آج ایران کے پاس جوہری بم ہوتا۔ ان کے مطابق امریکی فضائیہ اور فوج کی مدد سے ایران کے جوہری ڈھانچے کو بھاری نقصان پہنچایا گیا۔ انہوں نے دعویٰ کیا کہ ان حملوں سے ایران کی جوہری صلاحیت کافی کمزور ہوئی ہے۔

نیتن یاہو نے کہا کہ اسرائیل نے صرف ایران کے جوہری پروگرام کو ہی نہیں بلکہ ایران کے حمایت یافتہ عسکری نیٹورک کو بھی بڑا جھٹکا دیا ہے۔ سوئٹزرلینڈ میں جاری امریکہ-ایران مذاکرات کا ذکر کرتے ہوئے نیتن یاہو نے کہا کہ بات چیت کا جو بھی نتیجہ نکلے، اسرائیل کا مؤقف تبدیل نہیں ہوگا۔ انہوں نے کہا کہ جب تک میں اسرائیل کا وزیراعظم ہوں، ایران کبھی جوہری ہتھیار حاصل نہیں کر پائے گا۔

جنوبی لبنان میں اسرائیلی فوج کی موجودگی پر انہوں نے کہا کہ یہ قدم صرف شہریوں کی حفاظت کے لیے اٹھایا گیا ہے۔ کوئی بھی ملک اپنے لوگوں کی حفاظت کو خطرے میں نہیں ڈال سکتا۔ نیتن یاہو نے یہ بھی کہا کہ اسرائیل کی لڑائی لبنان سے نہیں بلکہ حزب اللہ سے ہے۔ ان کے مطابق حزب اللہ لبنان کو بھی نقصان پہنچا رہا ہے اور اسرائیل کو ختم کرنا چاہتا ہے۔ انہوں نے امید ظاہر کی کہ اگر حزب اللہ کو ختم کر دیا گیا یا اسے ہتھیار چھوڑنے پر مجبور کر دیا گیا تو مستقبل میں اسرائیل اور لبنان کے درمیان امن معاہدہ ہو سکتا ہے۔ ان کا کہنا ہے کہ وہ ایسے سمجھوتے پر دستخط کرنے کی امید کرتے ہیں۔