انگلینڈ نے فرانس کو شکست دے کر عالمی کپ میں تیسرا مقام حاصل کیا، ساکا نے ہیٹ ٹرک کی

شائقین نے فیفا عالمی کپ 2026 میں تاریخ کے سب سے دلچسپ اور زیادہ اسکورنگ میچوں میں سے ایک کا مشاہدہ کیا۔ انگلینڈ نے فرانس کو سنسنی خیز مقابلے میں چار کے مقابلے چھہ گولوں سے شکست دے کر عالی کپ  میں تیسرا مقام حاصل کیا ۔ 1966 میں عالمی چیمپئن بننے کے بعد عالمی کپ کی تاریخ میں یہ انگلینڈ کی بہترین کارکردگی ہے۔

میچ میں ایک موقع پر انگلینڈ کی برتری صفر کے مقابلے چار گولوں کی تھی لیکن دوسرے ہاف میں فرانس کے اسٹار فارورڈ کائلان ایمباپے کے طوفانی کھیل نے انگلش کیمپ میں خوف و ہراس پھیلا دیا۔ تاہم، بوکایو ساکا کی شاندار ہیٹ ٹرک اور جوڈ بیلنگھم کے آخری لمحات میں جادوئی گول کی بدولت انگلینڈ نے   تیسرا مقام حاصل کر لیا۔

میچ شروع ہونے سے پہلے کسی کو اتنے زیادہ اسکور کی توقع نہیں تھی۔ انگلینڈ نے اپنے ابتدائی گیارہ سے کپتان ہیری کین اور اسٹار مڈفیلڈر جوڈ بیلنگھم کو آرام دیا جبکہ گول کیپر جارڈن پک فورڈ کی جگہ ڈین ہینڈرسن کو موقع دیا گیا۔ کپتان کے آرم بینڈ پہنے ہوئے ڈیکلن رائس نے میچ کے صرف ڈھائی منٹ بعد پہلا گول کر کے فرانس کو دنگ کر دیا۔

18ویں منٹ میں ایزری کونسا نے شاندار ہیڈر کے ذریعے برتری کو 2-0 کر دیا۔ اس کے بعد بکایو ساکا کا شو تھا، جس نے پہلے ہاف کے اختتام سے عین قبل دو بیک ٹو بیک گولوں سے فرانسیسی دفاع کو مکمل طور پر تہس نہس کر دیا، جس سے انگلینڈ کو 4-0 کی زبردست برتری حاصل ہوئی۔

فرانسیسی ٹیم ایک نئی توانائی کے ساتھ میدان میں اتری۔ دوسرے ہاف کے ابتدائی منٹوں میں کائیلین ایمباپے نے انگلش دفاع کو توڑا اور فرانس کا پہلا گول کیا۔ اس کے فوراً بعد 54ویں منٹ میں بریڈلی بارکولا نے گیند کو جال میں ڈال کر اسکور 4-2 کر دیا۔ میچ کے 66ویں منٹ میں ایمباپے نے ایک اور تاریخی گول کیا۔ اس گول کے ساتھ، ایمباپے لیونل میسی کو پیچھے چھوڑتے ہوئے فیفا ورلڈ کپ کی تاریخ میں سب سے زیادہ گول کرنے والے کھلاڑی بن گئے۔ یہ ایمباپے کا ٹورنامنٹ میں 10 واں گول تھا، جس نے انہیں گولڈن بوٹ کی دوڑ میں آگے رکھا۔ اسکور اب 4-3 تھا اور فرانس برابری کے بہت قریب تھا۔

جیسا کہ فرانس نے میچ کو پنالٹی شوٹ آؤٹ تک لے جانے کے لیے حملے جاری رکھے، انگلینڈ کو 87ویں منٹ میں پنالٹی دی گئی۔ دباؤ کے اس اہم لمحے میں بکایو ساکا نے گیند کو گول پوسٹ کے دائیں کونے میں جا کر اپنی شاندار ہیٹ ٹرک مکمل کر کے انگلینڈ کو 5-3 سے آگے کر دیا۔  انجری ٹائم میں فرانس کے عثمانی ڈیمبیلے نے شاندار گول کر کے میچ کے اسکور 5-4 لا دیا ۔ لیکن آخری منٹوں میں آنے والے جوڈ بیلنگھم نے شاندار فیلڈ گول کر کے انگلینڈ کی فتح کو 6-4 سے اپنے نام کر لیا۔