ہندوستان اور ویسٹ انڈیز کا پہلا ون ڈے 13 اوور بعد منسوخ

گیانا: ہندوستان اور ویسٹ انڈیز کے درمیان پہلا ون ڈے مسلسل بارش کی وجہ سے جمعرات کو منسوخ کر دینا پڑا، تين میچوں کی اس سیریز کے اگلے دو مقابلے 11 اور 14 اگست کو کھیلے جائیں گے۔ ہندوستانی کپتان وراٹ کوہلی نے بارش سے متاثرہ اس مقابلے میں ٹاس جیت کر پہلے فیلڈنگ کرنے کا فیصلہ کیا تھا لیکن میچ کے دوران بار بار بارش آتی رہی اور امپائروں نے بالآخر میچ کو منسوخ قرار دے دیا۔

میچ منسوخ کیے جانے کے وقت ویسٹ انڈیز نے 13 اوور میں ایک وکٹ پر 54 رن بنائے تھے۔ اوپنر کرس گیل 31 گیندوں میں صرف چار رن بنا کر چائنامین بولر کلدیپ یادو کی گیند پر بولڈ ہوئے۔ ایون لوئیس نے 36 گیندوں میں دو چوکوں اور تین چھکوں کی مدد سے ناقابل شکست 40 رنز اور شائي ہوپ نے 11 گیندوں میں ناٹ آؤٹ چھ رن بنائے۔

میچ میں صبح سے ہی بارش ہونے کی وجہ سے ٹاس میں تاخیر ہوئی اور بارش رکنے کے بعد گراؤنڈز مین نے انتھک کوششوں سے میدان کو کھیلنے کے قابل بنایا۔ ٹاس ہوا اور ویسٹ انڈیز کے اوپنر میدان میں کھیلنے اترے۔ ایون لوئیس نے تو چوکے چھکے اڑائے لیکن گیل انتہائی سست کھیلے۔

گیل کے پاس اس میچ میں ویسٹ انڈیز کے بڑے بلے باز برائن لارا کے 10348 رنز کے ریکارڈ کو توڑنے کا شاندار موقع تھا لیکن وہ 31 گیندوں میں چار رن بنا کر آؤٹ ہو گئے۔ گیل کو اس ریکارڈ تک پہنچنے کے لئے سات رن کی ضرورت ہے جو وہ دوسرے میچ میں حاصل کر سکتے ہے۔ گیل نے سب سے زیادہ ون ڈے کھیلنے میں لارا کے 299 میچوں کی برابری کر لی ہے اور اگلے میچ میں اترتے کے ساتتھ وہ اپنے 300 ون ڈے پورے کر لیں گے اور لارا سے آگے نکل جائیں گے۔

تاخیر سے میچ شروع ہونے کے بعد اووروں کی تعداد کو گھٹا کر 43 کر دیا گیا تھا اور جب دوسری بار بارش سے رکاوٹ آئی تو اوور گھٹا کر 34 کر دئے گئے ۔ بارش آخر رکی تو لیکن میدان میں کئی حصے اتنے گیلے تھے کہ امپائروں نے ان پر کھیلنا مناسب نہیں سمجھا اور میچ آخر منسوخ کرنا پڑا۔ ہندستان نے اس سے پہلے ویسٹ انڈیز سے تین ٹوئنٹی -20 میچوں کی سیریز 3-0 سے جیتی تھی۔