دوسرے ٹیسٹ پر بھی ہندوستان کی گرفت مضبوط، ویسٹ انڈیز پر فالو آن کا خطرہ، پہلی اننگ میں 378 رن پیچھے، 4 وکٹ آؤٹ

2 میچوں کی ٹیسٹ سیریز کے دوسرے اور آخری میچ میں بھی ویسٹ انڈیز کی حالت انتہائی خستہ نظر آ رہی ہے۔ آج دوسرے دن کے کھیل میں بھی ہندوستانی بلے باز ویسٹ انڈین گیندبازوں پر پوری طرح حاوی نظر آئے، اور انھیں سکون تب ملا جب ہندوستانی کپتان شبھمن گل نے 518 رن بننے کے بعد اننگ ختم کرنے کا اعلان کر دیا۔ اس وقت تک ہندوستان کے محض 5 کھلاڑی ہی آؤٹ ہوئے تھے، اور قابل ذکر بات یہ ہے کہ ہندوستان کی طرف سے سب سے کم رن بنانے والے بلے باز کے ایل راہل رہے، جنھوں نے 38 رن بنائے۔ یعنی سبھی بلے بازوں نے ویسٹ انڈیز کے گیندبازوں کا خوب پسینہ بہایا۔

دوسرے دن کا کھیل جب شروع ہوا تو ہندوستان کا اسکور 2 وکٹ کے نقصان پر 318 رن تھا۔ ٹیم کے اسکور میں محض 6 رن جڑا تھا جب بہترین بلے بازی کر رہے سلامی بلے باز یشسوی جیسوال افسوسناک طریقے سے رَن آؤٹ ہو گئے۔ وہ کل کے اپنے اسکور 173 رن میں محض 2 رنوں کا ہی اضافہ کر پائے۔ لیکن اس کے بعد شبھمن گل اور نتیش کمار ریڈی کے درمیان تیز طرار 91 رنوں کی شراکت داری ہوئی۔ نتیش ریڈی 54 گیندوں پر 2 چھکوں اور 4 چوکوں کی مدد سے 43 رن بنا پائے۔ انھیں جومیل وریکن نے کیچ آؤٹ کرایا۔ اس کے بعد دھرو جوریل میدان پر آئے، اور انھوں نے بھی کپتان گل کا بھرپور ساتھ دیا۔ ان دونوں کے درمیان 102 رنوں کی شراکت داری ہوئی۔ جوریل نصف سنچری سے محض 6 رن پیچھے تھے جب ویسٹ انڈین کپتان روسٹن چیز نے انھیں کلین بولڈ کر دیا۔ ان کے آؤٹ ہوتے ہی ہندوستانی کپتان نے اننگ ختم کرنے کا اعلان کر دیا۔ اس وقت شبھمن گل 196 گیندوں پر 2 چھکوں اور 16 چوکوں کی مدد سے شاندار 129 رن بنا کر ناٹ آؤٹ تھے۔

ہندوستان کی لاجواب بلے بازی کے بعد باری گیندبازی کی تھی۔ تیز گیندبازوں جسپریت بمراہ اور محمد سراج نے کفایتی گیندبازی ضرور کی، لیکن ان دونوں کو وکٹ حاصل نہیں ہوا۔ پہلا وکٹ رویندر جڈیجہ کو ملا، جنھوں نے سلامی بلے باز جان کیمپبل کو 10 رن (25 گیندوں پر) کے ذاتی اسکور پر سائی سدرشن کے ہاتھوں کیچ آؤٹ کرایا۔ یہ کیچ خوب موضوعِ بحث رہا، کیونکہ کیمپبل نے بہت تیز سوئپ لگایا تھا اور شارٹ لیگ پر کھڑے سائی سدرشن کے ہاتھوں میں کسی طرح گیند چلا گیا۔ سدرشن تو خود کو بچانے کے لیے ہاتھ چہرے کی طرف لے گئے تھے، لیکن گیند ان کے ہاتھوں کو لگتے ہوئے ہیلمٹ کے اگلے حصے پر ٹکرایا اور پھر گیند نیچے کی طرف آ رہا تھا جو سدرشن کے ہاتھوں میں پھنس گیا۔

ویسٹ انڈیز کا یہ پہلا وکٹ 21 رنوں پر گرا تھا، اور پھر اس کے بعد تگنارائن چندرپال و ایلک اتھانیز نے 66 رنوں کی شاندار شراکت داری کی۔ چندرپال (67 گیندوں میں 34 رن) کو بھی رویندر جڈیجہ نے ہی آؤٹ کیا۔ اس کے بعد مزید 2 وکٹ جلدی جلدی گر گئے۔ ایلک اتھانیز کو کلدیپ یادو نے 41 رنوں کے ذاتی اسکور پر پویلین بھیجا، اور پھر اس کے بعد کپتان روسٹن چیز کو رویندر جڈیجہ نے اپنی ہی گیند پر کیچ آؤٹ کیا۔ روسٹن کوئی رن نہیں بنا سکے۔ آج کے دن کا کھیل جب ختم ہوا تو شائی ہوپ 46 گیندوں پر 31 رن بنا کر اور تیون املاچ 31 گیندوں پر 14 رن بنا کر کھیل رہے تھے۔ اس طرح ویسٹ انڈیز کا اسکور 4 وکٹ کے نقصان پر 140 رن ہو گیا ہے۔ یعنی ویسٹ انڈیز اب بھی ہندوستان کی پہلی اننگ کے مقابلے 378 رن پیچھے تھے۔ اس پر فالو آن کا خطرہ منڈلا رہا ہے، اور اندیشہ یہ بھی ہے کہ دوسرا ٹیسٹ میچ بھی تیسرے دن ہی نہ ختم ہو جائے۔