افغانستان کے خلاف واحد ٹیسٹ میں ہندوستانی کھلاڑیوں کو نہیں ملے گا آرام، بی سی سی آئی نے جاری کیا حکم

انڈین پریمیئر لیگ (آئی پی ایل) 2026 کے بعد ہندوستانی کرکٹ ٹیم افغانستان کے ساتھ گھریلو سیریز کھیلے گی۔ اس سیریز میں ایک ٹیسٹ اور تین ون ڈے میچز کھیلے جائیں گے۔ میڈیا رپورٹس کے مطابق افغانستان کے خلاف واحد ٹیسٹ میں ہندوستانی ٹیم اپنی پوری طاقت کے ساتھ میدان میں اترے گی۔ اس میچ کے لیے تمام کھلاڑی دستیاب ہوں گے اور کسی کو آرام نہیں دیا جائے گا۔ ساتھ ہی ورلڈ ٹیسٹ چیمپئن شپ کے موجودہ سائیکل میں اب سلیکشن کو لے کر کسی قسم کا تجربہ بھی نہیں کیا جائے گا۔ ہندوستان اور افغانستان کے درمیان ہونے والا یہ واحد ٹیسٹ 6 سے 10 جون کے درمیان ملاں پور کے مہاراجہ یدوِندر سنگھ انٹرنیشنل کرکٹ اسٹیڈیم میں کھیلا جائے گا۔

پی ٹی آئی کی ایک رپورٹ کے مطابق بورڈ آف کنٹرول فار کرکٹ ان انڈیا (بی سی سی آئی) اس واحد ٹیسٹ کے لیے کوئی سمجھوتہ کرنے کے موڈ میں نہیں ہے۔ اگرچہ یہ مقابلہ ورلڈ ٹیسٹ چیمپئن شپ کا حصہ نہیں ہے، اس کے باوجود تمام تیز گیند بازوں سمیت سارے کھلاڑی اس میچ کے لیے دستیاب رہیں گے۔ جسپریت بمراہ اور محمد سراج کے علاوہ پرسدھ کرشنا کے طور پر تین تیز گیند باز شامل کیے جائیں گے۔ سلیکٹرز نے سخت رویہ اپناتے ہوئے کہا ہے کہ ٹیسٹ کھیلنے والے کھلاڑیوں میں اگر کوئی زخمی ہوتا ہے تب ہی وہ افغانستان کے خلاف اس ٹیسٹ سے باہر رہے گا، اس کے علاوہ بی سی سی آئی کی جانب سے کوئی چھوٹ نہیں دی جائے گی۔

ہندوستانی ٹیم کو اگلے ورلڈ ٹیسٹ چیمپئن شپ فائنل تک مجموعی طور پر نو ٹیسٹ میچز کھیلنے ہیں۔ افغانستان کے خلاف واحد میچ کے بعد ٹیم انڈیا کو سری لنکا کا دورہ کرنا ہے، جہاں دو ٹیسٹ میچز کھیلے جائیں گے۔ اس کے بعد ہندوستان نیوزی لینڈ کا دورہ کرے گا اور وہاں بھی دو ٹیسٹ میچز ہوں گے۔ اگلے سال یعنی 2027 کے ابتدائی مہینوں میں آسٹریلیا ہندوستان کے دورے پر آئے گی اور اس گھریلو سیریز میں پانچ ٹیسٹ میچز کھیلے جائیں گے۔