تیسرا ون ڈے: وراٹ کی سنچری کے باوجود ہندستان کی شکست، سیریز 1-1 سے برابر

پنے، 27 اکتوبر (یو این آئی) کپتان وراٹ کوہلی (107) کی سنچری کے باوجود ہندستان کو ویسٹ انڈیز کے خلاف تیسرے ایک روزہ بین الاقوامی کرکٹ میچ میں سنیچر کو 43 رن سے شکست کا سامنا کرنا پڑا۔ ویسٹ انڈیز نے یہ مقابلہ جیت کر پانچ میچوں کی سیریز 1-1 سے برابر کرلی ہے۔

نوجوان وکٹ کیپر شائی ہوپ 95 رن کی ایک اور شاندار اننگز کی بدولت ویسٹ انڈیز نے ہندستان کے خلاف تیسرے ون ڈے میں ہفتہ کو 50 اوور میں نو وکٹ پر 283 رنز بنا ئے اور پھر وراٹ کی ۔38ویں سنچری کے باوجود ہندستان کو 47.4 اوور میں 240 رن پر سمیٹ دیا۔

وراٹ کو اس شکست سے کافی مایوسی ہوئی چونکہ انہیں کریز کے دوسری جانب سے ساتھ نہیں مل پایا۔ وراٹ کا وکٹ 42 ویں اوور میں 220 رن کے اسکور پر گرا اس کے ساتھ ہی ہندستان کی امیدیں ختم ہوگئیں۔ وراٹ کو آف اسپینر مارلن سیموئل نے بولڈ کیا۔

ہندستانی کپتان نے 119گیندوں میں 10 چوکوں اور ایک چھکے کی مدد سے107 رن بنائے۔ وراٹ کی یہ 38ویں ، ہدف کا تعاقب کرتے ہوئے 23 ویں ، مسلسل تیسری اور 62 ویں بین الاقوامی سنچری تھی۔وراٹ سریز میں مسلسل تیسری سنچری بنانے والے پہلے ہندستانی بلے باز بن گئے ہیں۔ اس معاملے میں سری لنکا کے کمار سنگا کارا مسلسل چار سنچریاں بنانے کر عالمی ریکارڈ اپنے نام کرچکے ہیں۔