ایشیا کپ 2022: سُپر فور میچ کے دران روایتی حریف ہندوستان اور پاکستان آج پھر مدمقابل

نئی دہلی: ایشیا کپ 2022 کے سپر فور میچ کے دوران روایتی حریف ہندوستان اور پاکستان آج پھر ایک دسرے سے مقابلہ کرنے جا رہے ہیں۔ گزشتہ ہفتہ گروپ مقابلہ کے دوران ہندوستان نے پاکستان کو ہاردک پانڈیا کی بلے بازی کی بدولت آخری اوور میں شکست دے دی تھی۔

سپر فور کا یہ مقابلہ آج (اتوار کے روز) دبئی میں کھیلا جائے گا اور ہندوستانی وقت کے مطابق شام 7.30 بجے شروع ہوگا۔ اس مقابلہ پر دنوں ممالک کے لوگوں کے علاوہ دنیا بھر میں موجود مداحوں کی بھی نظر رہے گی۔ متحدہ عرب امارات میں شدید گرمی کے درمیان دبئی انٹرنیشنل اسٹیڈیم کا ماحول اتوار کے روز مزید گرم ہو جائے گا۔

وراٹ کوہلی کے علاوہ پاکستان اور ہانگ کانگ کے خلاف میچوں میں ٹیم انڈیا کو جیت کی دہلیز پر پہنچانے والے پانڈیا، بھونیشور کمار اور سوریہ کمار یادو کی کارکردگی پر سبھی کی نظریں مرکوز رہیں گی۔ پاکستان کے خلاف ہونے والے اس اہم میچ سے قبل ہندوستان کو کچھ بڑے چیلنجز کا بھی سامنا ہے۔

کے ایل راہل نے چوٹ سے ابر کر کافی وقت بعد واپسی کی ہے لیکن وہ ایشیا کپ میں زیادہ رنز نہیں بنا سکے ہیں۔ وہ پاکستان کے خلاف پہلی ہی گیند پر صفر پر آؤٹ ہوئے اور ہانگ کانگ کے خلاف میچ میں انہوں نے 39 گیندوں پر 36 رنز بنائے۔ دو میچوں میں اچھا نہ کھیلنے والے راہل اب کپتان روہت شرما کے ساتھ مل کر بڑا اسکور کرنے کے خواہاں ہیں۔

بولنگ اٹیک میں اویش خان کی بات کریں تو وہ ابھی اپنی فارم میں نہیں ہیں۔ پاکستان کے خلاف ان کے دو اوورز میں 1/19 کے اعداد و شمار تھے، لیکن ہانگ کانگ کے خلاف اپنے چار اوورز میں 53 رنز دیئے، جہاں وہ ایک بھی وکٹ نہیں لے سکے۔

اس کے ساتھ ہی جڈیجہ نے بھی شاندار اننگز کھیلی جس کی وجہ سے ٹیم کو دوسرے میچ میں فتح حاصل ہوئی۔ سلیکشن کمیٹی کو یہ دیکھنے کی ضرورت ہے کہ آیا وہ اب بھی اپنے بائیں ہاتھ کے کھلاڑی رشبھ پنت کو اپنی پلیئنگ الیون میں برقرار رکھیں گے یا دیپک ہڈا یا اکشر پٹیل کو، جو جڈیجہ سے ملتے جلتے ہیں، انہیں پلیئنگ الیون میں شامل کریں گے۔

وہیں، پاکستان کی ٹیم نے ہانگ کانگ کے خلاف 155 رنز سے بڑی جیت حاصل کی۔ خوشدل شاہ کے فائنل ٹچ دینے سے پہلے ان کے تیز گیند بازوں اور اسپنرز نے وکٹیں حاصل کیں، جب کہ محمد رضوان اور فخر زمان نے نصف سنچریاں اسکور کیں لیکن ٹاپ آرڈر کے حوالہ سے ان کے خدشات برقرار ہیں۔

ایشیا کپ 2022 اب اس مرحلے پر ہے جہاں کوئی بھی ٹیم ہلکی نہیں ہے اور اسے کم نہیں سمجھا جا سکتا۔ ہندوستان اور پاکستان اچھی طرح جانتے ہیں کہ سپر فور میں ایک غلط قدم بھی فائنل کے لیے ان کے منظم منصوبے کو خطرے میں ڈال سکتا ہے۔

دونوں ٹیمیں درج ذیل ہیں:

ہندوستان: روہت شرما (کپتان)، وراٹ کوہلی، کے ایل راہل (نائب کپتان)، سوریہ کمار یادو، دیپک ہڈا، رشبھ پنت (وکٹ کیپر)، دنیش کارتک، ہاردک پانڈیا، اکشر پٹیل، آر کے اشون، یوجویندر چہل، روی بشنوئی، بھونیشور کمار، ارشدیپ سنگھ اور اویس خان۔

پاکستان: بابر اعظم (کپتان)، شاداب خان (نائب کپتان)، آصف علی، فخر زماں، حیدر علی، حارث رؤف، افتخار احمد، خوشدل شاہ، محمد نواز، محمد رضوان (وکٹ کیپر)، حسن علی، نسیم شاہ، محمد حسنین، شاہنواز دہانی، عثمان قادر۔