یکم جنوری سے نئے اصولوں کا اطلاق، ایل پی جی سے جی ایس ٹی تک اہم تبدیلیاں

نئی دہلی: نئے سال 2025 کی شروعات کے ساتھ ہی ملک میں کئی اہم تبدیلیاں یکم جنوری سے نافذ ہو رہی ہیں۔ یہ تبدیلیاں ہر گھر اور ہر جیب پر اثر ڈالیں گی۔ ان میں کچھ اصول ایسے ہیں جو عوام کے لیے راحت کا سبب بنیں گے، جبکہ کچھ سے بوجھ بڑھ سکتا ہے۔ یہاں ہم چند اہم تبدیلیوں پر روشنی ڈال رہے ہیں۔

کمرشل ایل پی جی سلنڈر کی قیمتوں میں کمی

یکم جنوری 2025 کو آئل مارکیٹنگ کمپنیوں نے 19 کلوگرام والے کمرشل ایل پی جی سلنڈر کی قیمتوں میں کمی کا اعلان کیا ہے۔ دہلی میں کمرشل سلنڈر کی قیمت اب 1804 روپے ہو گئی ہے، جو پہلے 1818.50 روپے تھی، یعنی 14.50 روپے کی کمی ہوئی۔ اسی طرح کولکاتا، ممبئی اور چنئی میں بھی قیمتوں میں 15 سے 16 روپے کی کمی دیکھی گئی۔ تاہم، 14 کلوگرام والے گھریلو گیس سلنڈر کی قیمتیں غیر تبدیل رہیں اور یہ دہلی میں 803 روپے میں دستیاب ہے۔

ایئر ٹربائن فیول (اے ٹی ایف) کے نرخ

ہر ماہ کی طرح، یکم جنوری کو بھی آئل کمپنیوں نے ایئر ٹربائن فیول (ہوائی ایندھن) کے نرخوں میں تبدیلی کا امکان ظاہر کیا ہے۔ اگر قیمتوں میں اضافہ ہوا تو ہوائی سفر کرنے والوں پر اس کا اثر پڑے گا۔

ای پی ایف او کے نئے اصول

ایمپلائز پروویڈنٹ فنڈ آرگنائزیشن (ای پی ایف او) نے پینشنرز کے لیے یکم جنوری سے ایک نیا اصول نافذ کرنے کا اعلان کیا ہے۔ اس کے تحت پینشنرز کسی بھی بینک سے اپنی پنشن رقم نکال سکیں گے اور انہیں اضافی تصدیق کی ضرورت نہیں ہوگی۔

یو پی آئی 123پے کی حد میں اضافہ

ریزرو بینک آف انڈیا (آر بی آئی) نے یو پی آئی 123پے کے تحت فیچر فون سے آن لائن ادائیگی کی حد 5000 روپے سے بڑھا کر 10000 روپے کرنے کا فیصلہ کیا ہے۔ یہ اصول یکم جنوری سے نافذ ہوگا۔

شیئر مارکیٹ کے اصولوں میں تبدیلی

سینسیکس اور دیگر انڈیکسز کے ماہانہ ایکسپائری قواعد تبدیل کر دیے گئے ہیں۔ اب ہفتہ وار ایکسپائری جمعہ کے بجائے منگل کو ہوگی، جبکہ سہ ماہی اور چھ ماہی معاہدے کی ایکسپائری آخری منگل کو ہوگی۔

کسانوں کے لیے لون کی حد

یکم جنوری سے کسانوں کو بغیر ضمانت کے لون کی حد میں اضافہ کر دیا گیا ہے۔ اب انہیں 1.6 لاکھ کے بجائے 2 لاکھ روپے تک کا لون بغیر کسی گارنٹی کے دستیاب ہوگا۔

بینک اکاؤنٹس کی بندش

ریزرو بینک نے یکم جنوری سے غیر فعال، زیرو بیلنس اور بغیر استعمال والے بینک اکاؤنٹس کو بند کرنے کا فیصلہ کیا ہے۔ یہ فیصلہ لاکھوں کھاتہ برداروں پر اثر انداز ہوگا۔

کاروں کی قیمتوں میں اضافہ

ماروتی، ٹویوٹا اور ٹاٹا موٹرز سمیت دیگر کمپنیاں یکم جنوری سے اپنی گاڑیوں کی قیمتوں میں 2 سے 4 فیصد تک اضافہ کریں گی، جس سے کار خریدنا مہنگا ہو جائے گا۔

ٹیلی کام کے نئے اصول

ٹیلی کام کمپنیوں کے لیے یکم جنوری سے رائٹ آف وے رول نافذ ہوگا۔ اس کے تحت نئی موبائل ٹاورز اور فائبر آپٹک لائن کی تنصیب آسان ہو جائے گی، جس سے نیٹ ورک سروس میں بہتری آئے گی۔

جی ایس ٹی اصول سخت

یکم جنوری سے جی ایس ٹی اصولوں میں سختی کی جائے گی۔ ملٹی فیکٹر آتھنٹی کیشن (ایم ایف اے) کو تمام ٹیکس دہندگان کے لیے لازمی قرار دیا جائے گا، جو پہلے صرف بڑی کمپنیوں کے لیے تھا۔

یہ تبدیلیاں نہ صرف ملک کی معیشت بلکہ عوام کی روزمرہ زندگی پر بھی گہرا اثر ڈالیں گی۔